11 korriku është një datë që kujton një ndër ngjarjet më të rënda që kanë mbetur të ngulitura thellë në memorie, atë të Masakrës së Srebrenicës!
Ditën e sotme bëhen 26 vjet nga masakra më e përgjakshme në Europë që nga fundi i Luftës së Dytë Botërore.
Më 11 korrik të vitit 1995, forcat serbe të Bosnjës hynë në Srebrenicë dhe vranë në mënyrë të pamëshirshme mbi 8,000 burra dhe djem myslimanë, ndërsa trupat e tyre i hodhën në gropa në pyjet përreth.
Edhe pas kaq shumë kohësh, ende vazhdojnë ende të gjenden varre masive! Çdo vit, eshtrat e atyre që identifikohen gjatë fundit të vitit varrosen në Qendrën Përkujtimore në Potoçari!
Sivjen 19 viktimave të gjenocidit në Srebrenicë varrosen sot në Qendrën Përkujtimore Potoçari. Viktima më e re që varroset është Azmir Osmanoviç, i cili ishte 16 vjeç kur u vra. Eshtrat e tij u gjetën në një varr masiv dhe u identifikuan në maj të këtij viti.
Viktima më e vjetër që varroset është Husein Kurbashiç – 63 vjeç në kohën kur u vra.
Në Qendrën Përkujtimore Potoçari, deri më tani, janë të varrosura mbi 6,650 viktima – në mesin e tyre mbi 430 të mitur.
Në lokacione të tjera, sipas dëshirës së familjarëve, janë të varrosura mbi 230 viktima, ndërsa kërkimet vazhdojnë ende për rreth 1,000 të zhdukur.
