Ka arritur mbi 45 milionë klikime në Youtube dhe tashmë hiti i dasmave shqiptare “Skifterja e zemrës”, po i kalon kufijtë.
Bashkëpunimi i Klajdi Harunit dhe Bes Kallakut është huazuar nga dy këngëtarë të njohur grekë. Ka qenë autori i këngës Klajdi Haruni ai i cili ka publikuar në Instagram një version të ri të këngës në gjuhën greke.
Dy artistët nga shteti fqinj Tus dhe Plazaman e kanë transformuar këngën në gjuhën e tyre dhe kanë bërë një videoklip mjaft interesant. Për më tepër në fillim të saj ata falënderojnë Besin dhe Klajdin në gjuhën shqipe: “Bes Kallaku, Klajdi Haruni, faleminderit shumë”.
“Skifterja e zemrës” greqisht për qejf. U bëmë dhe ne ndërkombëtarë loku”, – ka shkruar Klajdi në postimin e tij.
Nuk është hera e parë që reperi i njohur grek Tus bashkëpunon me shqiptarët.
Për të gjithë ju që nuk e njihni, vitin që shkoi Tus i këndoi shqiptares me Brunon e “Three Dots”. Ai madje erdhi në Shqipëri për të xhiruar klipin.
