Khloe Kardashian është paditur në gjyq! Do thoni ju nga kush? Nga ish-asistenti, i cili pretendon se u pushua nga puna pasi kishte marrë leje për shkak se kishte thyer këmbën. Matthew Manhard, i cili filloi të punojë për bashkëthemeluesen e Good American në 2019, pretendon se u pushua nga puna në nëntor 2022, sipas një padie të marrë nga TMZ.
Manhard pretendon se ai i tha Kardashian se nuk ishte në gjendje të punonte pasi ishte dëmtuar, e kur u kthye në punë pas 6 muajsh, iu komunikua se ishte pushuar nga puna. Në padinë e tij, ish-asistenti i Khloe pretendon se ai nuk ishte në gjendje të bënte pushimet e kërkuara me ligj gjatë turnit, sepse ishte shumë i zënë me detyrat e tij të përditshme.
Manhard, i cili po kërkon kompensim monetar, pretendon se nuk paguhej jashtë orarit në ditët kur punonte me turne të gjata 12-orëshe. Përfaqësuesit e Kardashian i kanë mohuar akuzat.
“Është për të ardhur keq të mësosh se një ish-punonjës do të zgjidhte këtë rrugë. Matthew u klasifikua siç duhet dhe u kompensua për rolin e tij”, thanë përfaqësuesit e Kardashian për TMZ.
“Në fund të punës së tij, ai ishte në një pushim për një periudhë të gjatë kohore dhe roli përfundimisht duhej të zëvendësohej,” tha përfaqësuesi për lejen e Manhard. “Ne nuk do të tolerojmë akuza të rreme dhe do të provojmë se kjo është një padi joserioze.”
Motra e Khloe, Kim Kardashian, u përball me një padi të ngjashme në vitin 2021. Ajo u padit nga 7 ish-anëtarë të stafit të kopshtarisë dhe mirëmbajtjes së rezidencës së saj në Hidden Hills, për sjelljesh të dyshimta. Paditësit pretenduan se nëna e katër fëmijëve ishte vonë me pagën e tyre, u mbajti 10 për qind të pagës për taksat e më pas nuk ia dërgoi ato shuma qeverisë.
