Ditën e premte, në Ostren të Bulqizës u regjistrua një ngjarje e rëndë.
Rajmonda Tola, 45 vjeç, u gjet e pajetë në banesën e saj bashkë me djalin, Fatjonin, 14 vjeç dhe vajzën, Rudinën 22 vjeç, ndërsa vajza tjetër 16-vjeçarja Merita Tola, u gjet me shenja jete dhe arriti të mbijetonte.
Siç u bë e ditur, nëna dhe fëmijët humbën jetën si pasojë e asfiksisë nga tymi i përhapur nga soba me drru.
16-vjeçarja, Merita Tola, nuk e ka mësuar ende lajmin e trishtë për familjarët e saj.
E afërmja e Meritës ka treguar se vajza kërkon vazhdimisht të ëmën.
“Vajza është ende e tronditur. Vajza nuk di gjë, thjesht parandjen dhe kërkon nënën e saj. E kam mbajtur gjithë kohën me mashtrime, nuk kam zemër t’i them vajzës i kanë thënë se e kanë sjellë në spital pasi është me grip. Pranë vajzës është një psikologe, kërkon të bisedojë nga shëndeti vajza është mirë, por është e traumatizuar kërkon nënën, motrën dhe vëllanë. Ajo kupton se është e sëmurë, kërkon dua mamin dua mamin. Edhe mua po më digjet shpirti. Vajzës i kam thënë ishte me grip”- rrëfeu e afërmja.
