Poetja Rita Petro ka folur si rrallëherë për jetën e saj private në një intervistë për “Euronews Albania”.
Pa dorashka fare, Petro tregoi ndjesitë e saj, mënyrën si e nis mëngjesin, madje foli edhe për jetën sentimentale pas humbjes së partnerit.
Dita niste me kafen e mëngjesit, pak gjimnastikë dhe pak pikturë. Piktura ka qenë një nga pasionet e Ritës dhe poetja i ka kushtuar pjesën e parë të ditës duke hedhur në telajo emocionet e momentit.
Rita Petro foli gjithashtu për ndarjen e dhimbshme nga jeta të bashkëshortit të saj, si dhe dhimbjen dhe boshllëkun me të cilat është mësuar të jetojë. Poetja ka treguar se në marrëdhënien e tyre, askush nuk ishte i varur nga tjetri dhe pikërisht kjo pavarësi në marrëdhënie e ka mësuar Ritën të jetojë edhe pa partnerin e ndjerë.
Sa i përket dashurive të reja, ajo i ka hapur dyert për këtë ndjenjë të bukur, në çdolloj forme.
“Në fund të fundit ne kemi ardhur në këtë jetë dhe rrugëtimin e kemi vetëm, përveç “aksidenteve” që mund të ndodhin bashkë. Jemi në një rrugëtim vetëm. Mund të ngjitemi në rrugën që rrallë shkohet. Është rruga e ngritjes shpirtërore, ngjitemi dyshe dhe janë një fat i madh njerëzit që takojmë. Me thënë të drejtën jeta ime ka qenë gjithnjë e mbushur, siç ka qenë dhe jeta e partnerit tim. Prandaj kemi qenë dy njerëz që kemi ndenjur bashkë se kemi dashur të rrimë bashkë, jo sepse kemi krijuar lidhje varësie.
Ne kemi qenë të pavarur dhe unë nuk kam ndjerë atë pjesë që ndonjëherë ndjejnë gratë dhe burrat, që më humbjen e partnerit jeta e tyre merr fund. Sepse është krijuar si lidhje varësie. Në momentin që je një person i lirë atëherë normalisht jeta për ty vazhdon. Normalisht gjithë dyert janë të hapura kundrejt dashurisë se sa lloji i dashurisë. Të gjitha llojet e dashurisë janë të mirë se ardhura derisa të kemi jetën, sepse në fund të fundit është një energji që e kemi brenda vetës,”- tha Rita Petro.
