Policia zbardhi detaje të reja nga përplasja e mbrëmjes së të enjtes me armë zjarri në zonën e ish-bllokut në Tiranë, ku një person mbeti i vdekur, ndërsa tre të tjerë u plagosën. I vrarë mbeti truproja i Ervis Martinajt, Fabiol Gaxha, i cili mbeti i vdekur në vend pasi mori një plumb në kokë.
Nga përleshja me armë zjarri mbetën të plagosur edhe Ervis Martinaj, 36 vjeç dhe Eljon Hato, 28 vjeç, të cilët u arrestuan nga policia në flagrancë dhe janë shpallur në kërkim tre të tjerë.
Sipas informacioneve paraprake mësohet se, autori është një person që mban një pozicion të rëndësishëm në strukturat shtetërore dhe mban pozicionin e efektivit të Forcave Komando (një ekspert i përdorimit të armëve), por kjo gjë nuk është pasqyruar në njoftimin zyrtar të policisë.
Në cilësinë e provës materiale u sekuestrua arma “Glock”, gëzhoja, shumë në euro, automjete dhe aparate celular.
Grupi i posaçëm hetimor i përbërë nga Specialistë të Taks Forcës Qendrore, Specialistë të Policisë së Shtetit, Specialistë të Hetimit të Krimeve ndaj jetës dhe pronës në Drejtorinë Vendore të Policisë Tiranë, nën drejtimin e një grupi Prokurorësh të Prokurorisë së Rrethit Gjyqësor Tiranë, bënë arrestimin në flagrancë të shtetasve :
– Ervis Martinaj, 36 vjeç, banues në Tiranë
– Eljon Hato, 28 vjeç, banues në Shkodër
Si dhe u shpallën në kërkim shtetasit :
– Ervin Mata 31 vjeç, banues në Tiranë
– Fabio Allushi 42 vjeç, banues në Tiranë
– Mervjol Bilo 41 vjeç, banues në Tiranë
Këta shtetas mbrëmjen e djeshme në rrugën “Ibrahim Rugova”, janë konfliktuar në ambientet e brendshme të një lokali duke qëlluar me armë zjarri në drejtim të njëri – tjetrit, ku si pasojë e të shtënave mbeti i vrarë shtetasi F. G., dhe u plagosën shtetasit E. M., dhe E. H., të cilët ndodhen në spital nën kujdesin e mjekëve.
Janë sekuestruar në cilësinë e provës materiale :
– armë zjarri tip “Glock”
– 11 gëzhoja
– 10 000 euro
– tre automjete
– aparate celular
Materialet iu referuan për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale “Vrasje në rrethana të tjera cilësuese, kundër dy ose më shumë personave e kryer në bashkëpunim” dhe “Prodhim dhe mbajtja pa leje e armëve dhe e municionit luftarak”.
