Tre raste urgjente brenda 60 minutash janë transportuar me autoambulancë në ambientet e Infektivit në QSUT.
Sipas raportimit të News 24, brenda autoambulancave ndodheshin pacientë të dyshuar me COVID 19.
Madje në vendngjarje ka pasur një debat. Personeli i veshur pa uniformën speciale ka hapur derën e automjetit duke thirrur me ze të lartë: “Na mashtrove”.
Nga biseda me zë të lartë mes stafit të autoambulancës dhe një familjari të gruas që ndodhej brenda mjetit u mësua se gjatë thirrjes për ndihmë në nr. 127 ishte mbajtur e fshehtë situata shëndetësore e pacientes dhe historiku i udhëtimit të saj.
21:30- Dy raste të reja të dyshuara me Koronavirus te Infektivi! Drejtori i Urgjencës: “Këto ditë do arrihet piku!”
Dy raste të dyshuara me Koronavirus janë paraqitur pak më parë te Infektivi me autoambulancë.
Lajmi është bërë publik sot në emisionin “Open”, me Eni Vasilin. Personat dyshohet se kanë qenë të vetëizoluar dhe mjekët i kanë transmetuar nën kushte të plota të izolimit.
Edhe “Faxweb.al” ka raportuar se nga njëra prej ambualancave ka zbritur një pacient që dukej në gjendje të rëndë, ndërsa stafi mjekësor që po e shoqëronte ishte veshur me uniformën që përdoret për t’u mbrojtur.
Në një lidhje të drejtpërdrejtë, Drejtori i Urgjencës Kombëtare Skënder Brataj tha se këto ditë pritet që të arrihet piku i gjendjes së shkaktuar nga Koronavirusi.
“Qoftë nga telefonatat, por edhe numri i të infektuarve besoj se piku do të arrihet këto dy-tre ditë”, tha ai.
Deri më tani, numri zyrtar i të infektuarve ka shkuar në 23 në vendin tonë. Për 8 rastet e reja të të prekurve ka reaguar edhe Ministria e Shëndetësisë sipas të cilës, nga këto raste, 2 janë në Durrës, 2 në Elbasan, 1 në Rrogozhinë dhe 3 në Tiranë.
