Është rritur numri i të prekurve me Koronavirus në Shqipëri në 12.
Ministria e Shëndetësisë ka konfirmuar sot dy raste të reja të infektuara me virusin COVID-19.
Në një njoftim për shtypin, zëvendësministrja e Shëndetësisë, Mira Rakacolli njoftoi se janë analizuar 43 testime të reja dhe nga këto kanë rezultuar pozitivë dy persona.
Njëri prej tyre është i lidhur me rastin e parë me Koronavirus ndërsa i dyti është një i moshuar në Lushnjë që ka udhëtuar në Bergamo, Itali.
“Janë kryer 43 testime të reja, kanë rezultuar pozitive vetëm 2 raste. Njëri prej tyre është i lidhur me rastin e parë, tjetri një i moshuar në Lushnje 73 vjeç që ka udhëtuar nga Bergamo. Të dyja rastet janë në vetëizolim dhe janë në gjendje të mirë shëndetësore”, njofton ministrja e Shëndetësisë.
Rakacolli u shpreh se nga 157 njerëz të dyshuar në total, 12 janë pozitivë. Lidhur me gjendjen e tyre shëndetësore, ajo njoftoi se 3 persona janë të shtruar në Infektiv në gjendje stabël, dhe një në Durrës.
“7 janë në vetë izolim, pa shenja klinike. Po vazhdojmë të gjurmojmë rastet”, vijoi ajo.
Deri më tani janë zbuluar katër vatra infeksioni nga Koronavirusi në Shqipëri:
-E para dhe më e madhja është ajo e babë e bir nga Tirana që kanë infektuar edhe shtatë të tjerë.
-Rasti i dytë i pavarur është ai i një 31-vjeçari sërish nga Tirana.
-Rasti i tretë është ai i një gruaje 75-vjeçare nga Durrësi, e cila dyshohet të ketë infektuar mjaft të tjerë, përfshirë edhe mjekë e infermierë të spitalit të qytetit që po e trajtonin në spital si rast të zakonshëm gripi.
-Rasti i katërt i pavarur është ai i një personi nga Lushnja i konfirmuar sot nga zv.ministrja e Shëndetësisë.
/Iconstyle.al
