Kaley Cuoco dhe i fejuari i saj Karl Cook u betuan për dashuri të përjetshme në një ceremoni romatike në San Diego, në Kaliforni. Ishte ylli i serialit “The Big Bang Theory”, ajo që bëri publike lajmin e martesës përmes një postimi në profilin e saj në “Instagram”.
32-vjeçarja i tha “Po” biznesmenit amerikan, pasi qëndruan të fejuar për më shumë se shtatë muaj. Kaley kishte zgjedhur të ishte një nuse aspak tradicionale, ndaj u shfaq e veshur me një jumpsuit të bardhë dhe flokët e kapura bisht.
Edhe aktorja Vannesa Paradis i ka dhënë fund beqarisë në një ceremoni të thjeshtë në Francë, ditën e shtunë. Sipas “Dailymail”, Vannesa Paradis dhe Samuel Benchetrit u dashuruan gjatë xhirimeve të filmit dramatik “Chien” në vitin 2016. 45-vjeçarja kishte zgjedhur një fustan të bardhë në formë A-je, të kombinuar me një vello të gjatë teksa mbante flokët e saj lëshuar. Vannesa Paradis është ish-partnerja e aktorit Johnny Depp.
