Reperi i njohur Stresi ka qenë një ndër personat publikë që është angazhuar që prej fillimit në protestën e kërkimit të drejtësisë për jetën e humbur të 25-vjeçarit Klodian Rasha.
Ai ka përdorur rrjetet sociale për t’i bërë thirrje ndjekësve të tij t’i bashkohen në protestë, madje është shpallur edhe në kërkim nga policia, e cila s’ka mundur ta ndalë dot reperin.
Në një rrëfim për Prive, ai ka zbuluar se ka marrë një shok që punon me funeralet dhe kanë shkuar në Laç e nga Laçi në Kosovë.
Ai u shpreh sërish se kjo protestë është organizaur 100% prej tij në çdo detaj. Reperi ka thënë se në protestë nuk ishin personalisht për ministrin Lleshaj që dha dorëheqjen, por për institucionet dhe kabinetin e Rilindjes.
Stresi u shpreh se në protestë nuk ka lejuar asnjë parti politike, madje as përkrahës të Partisë Demokratike, për të cilën ka shprehur dhe vetë mbështetjen publikisht.
Ndërkohë, reperi vijon me postimet e tij në rrjetet sociale, ku publikon foto e video nga protesta. Së fundmi, nga shtëpia ku ndodhet në Kosovë ai ka ndarë një status ku thotë se do marrë sërishpjesë në protestë ditën e sotme.
Më tej, betohet se nuk ka asnjë synim politik, duke shtuar se nuk i intereson askush veç drejtësisë.
Tu mendu për nesër. Në orën 18:00 unë jam me ju nesër. Sapo të mblidhemi në shumicë do jem aty si fantazëm. Ju betohem në Zot se nuk kam asnjë lloj synimi politik, s’më intereson askush në këto momente, përveç drejtësisë. Më dërgoni të gjitha infot, videot, postoblloqet, që të jem pjesë pjesë e protestës dhe të bëhem me ju.
Në rrjete sociale, reperi ka ndarë me ndjekësit një bisedë private me babain e tij në Whatsapp, Sali Lushajn, të cilit i kërkon përkrahjen e tij për protestën.
“Unë du përkrahjen tënde”- shkruan Stresi të cilit i ati ia kthen: “As nuk bëhet fjalë, ti ke protestu e nuk ke vra njeri.”
Këto mesazhe, Stresi i ka shoqëruar me fjalët:
“Shoku im i ngushtë është krenar për kauzën tonë. Kur ke përkrahjen e babës, e ke gjithë fuqinë.”
Prej tre ditësh tashmë, qytetarët e Tiranës po organizojnë një protestë në nder të Klodian Rashës i cili u vra pabesisht nga efektivi duke gdhirë e hëna. Revoltën e tyre qytetarët e kanë shprehur në djegie e shkatërrime objektesh, siç janë pema e Krishtlindjeve, apo koshat e mbeturinave.
Protesta ka patur edhe në qytetet e tjera, por ndryshe nga kryeqyteti, vihet re se kanë qenë më paqësore.
Kreu i qeverisë Edi Rama hoqi përgjegjësinë nga struktura e Policisë së Shtetit dhe e drejtoi atë vetëm te një individ, por në fakt qytetarët e dinë se kjo strukturë është e kalbëzuar, që nga hyrja në këtë strukturë, shmangia e përgjegjësisë, mostrajtimi i duhur në Akademinë e Policisë, etj.
E gjithë struktura nga Drejtoria e Policisë, te Shërbimi i Çështjeve të Brendshme dhe Ankesave deri tek Forcat Shqiponja, të gjithë drejtuesit duhet të largohen. Konkretisht, “iconstyle.al”, duke iu bashkuar nismës së protestuesve dhe kërkesës së tyre, kërkon largimin e :
-Muhamet Rrumbullaku, drejtor i SHÇBA, që manipuloi hetimin.
-Ardi Veliu, drejtori i Policisë së Shtetit.
-Gjovalin Loka, drejtori i Departamentit për Sigurinë Publike, mban përgjegjësi për dhunën ndaj protestuesve.
-Rebani Jaupaj, drejtor i Policisë Tiranë duhet të mbajë përgjegjësi pse policia ishte pa kamera në trup natën e ekzekutimit të Klodianit.
