Ministrja e Arsrimit, Besa Shahini ditën e djeshme dha vendimin për shkollat.
Ajo tha se nxënësit nuk do të kthehen në auditoret e shkollave, me përjashtim të maturantëve.
Me rregulla të rrepta për distancim social, ata do të kthehen në shkollë për 2 javë në mënyrë që të përgatiten për provimet e maturës.
Maturantët do të kthehen në bankat e shkollës në datën 18 maj deri në 5 qershor, ndërsa provimet do të zhvillohen ndërmjet datave 8 dhe 18 qershor.
Drejtoresha e Përgjithshme e Politikave të Arsimit, Zamira Gjini në një intrevistë për “Abc News”, ka folur për vendimin e marrë nga ministria e Arsimit.
Ajo tregoi se si do të zhvillohen provimet e maturës dhe pyetjet që do të përmbajnë.
“Kishim përgatitur disa skenarë. Vendimarrja ishte në akordim edhe me task-forcën dhe dolëm në përfundimin që në shkollë të shkojnë vetëm maturantët. Do të përdoren edhe shkollat 9-vjeçare për të zhvilluar mësim maturantët që të krijohen distancat. Ajo që ne kemi bërë, është që duke pasur parasysh që shkollat 9-vjecare nuk do të jenë, do të ketë një rindarje të re të nxënësve në klasa. Të gjithë masat janë marrë”, u shpreh Gjini.
Më tej ajo sqaroi edhe mënyrën sesi do të bëhen provimet nga maturantët. Gjini tha se ketë vit do të ketë vetëm pyetje me alternativa.
“Kemi njoftuar që më parë, kemi nxjerrë edhe programe të reja për maturantët, ku nxënësit do të shikojnë programin orientues, ku janë hequr ato tema që janë zhvilluar në kushtet e shtëpisë. Do të kenë teste vetëm me alternativa. Do të shikohet që mënyra e korrigjimit të bëhet dixhitale, por janë procedura për më pas”, tha ajo.
Për klasat e pesta dhe të nënta këtë vit nuk do të ketë provime.
“Janë dy momente kur mbaron një cikël i arsmit. Në klasat e pesta nuk është provim me notë, por vlerësim për arritjet. Për këtë vit ky provim nuk do të zhvillohet. Për provimin e klasës së 9-të, për të cilin ne kemi marrë vendimin që nuk do të zhvillohet. Por në dëftesat e tyre do të jenë notat e klasës së nëntë. Ne kemi parë edhe modelet e tjera. Do ti nxirret nota e provimit, duke konsideruar notën e lëndës nga klasa e 6 në të nëntën. Do të jetë një mesatare. Do të kenë dëftesë. Me këtë dëftesë do të regjistrohen në gjimnaz”, tha Gjini.
Ajo tha se të gjithë nxënësit që duan të përsërisin vitin duhet të lajmërojnë paraprakisht.
“Nëse duan të përsërisin vitin mund ta përsërisin me një kërkesë, pa u penalizuar dhe pa u shënuar se janë mbetës. Por prindërit nëse do vendosin për këtë gjë duhet të njoftojnë shkollën.”
