Dorëzimi i zarfit të gabuar në mbrëmjen e “Oscar”-it, ku si rrjedhojë u shpall fituesi i gabuar, u ka kushtuar shtrenjtë dy personave , që konsiderohen si përgjegjës për këtë gabim historik.
Atyre u është hequr përgjithmonë e drejta për të punuar për Akademinë e Filmit dhe Shkencave. Këtë e ka njoftuar vetë presidentja e akademisë prestigjioze, Cheryl Boone Isaacs. Brian Cullinan dhe kolegia e tij Martha Ruiz, kishin detyrën e dorëzimit të zarfeve me emrat e fitueseve në kategoritë e ndryshme, në emër të kompanisë “Price Waterhouse Coopers”, që merret me numërimin e votave dhe organizimin e zarfeve.
Edhe pse ishte Cullinan, ai që u cilësua përgjegjës për ngatërresën, në momentin e shpalljes së filmit më të mirë të 2017-s, akademia ka vendosur t’i ndëshkojë të dy partnerët dhe madje do të rishikojë edhe lidhjet me vetë kompaninë, “PriceWaterhouseCoopers”.
Ndërkohë, BBC shkruan sot se dyshja , që shkaktoi incidentin e famshëm, të çmimeve Oscar ruhet me truproja për shkak se në drejtim të tyre kanë nisur kërcënimet. Menjëherë pas incidentit, në rrjete sociale u publikuan fotografi të familjes së tyre. Pas kësaj nisën kërcënimet për vdekje dhe tashmë në shtëpitë e secilit prej audituesve ka një grup truprojash,që kujdesen për sigurinë.
Ëarren Beaty dhe Faye Dunaëay shpallen “La La Land” si filmin më të mirë, e ndërsa producentët e muzikalit ishin ngjitur në skenë për të bërë falënderimet e rastit, u zbulua se statuja e artë shkonte për një tjetër film, “Moonlight”.
Ky është cilësuar si një prej gabimeve më të rënda në 89 vitet e historisë së “Academy Awards”. Më vonë u mësua se Cullinan i kishte dhënë zarfin e gabuar 2 prezantueseve të çmimit, atë me emrin e aktores më të mirë, Emma Stone për rolin në La La Land.
