Një i ri u qëllua për vdekje nga njerku i tij gjatë një zënke që mund të ketë qenë e lidhur me pandeminë e koronavirusit, tha policia në Atlanta.
Bernie Hargrove, 42 vjeç, u akuzua mëngjesin e të enjtes për vrasjen e De’onte Roberts, 16 vjeç, raporton Atlanta Journal.
Nëna e Roberts i tha policisë se adoleshenti kundërshtoi urdhrat e nënës së tij dhe të njerkut për të qëndruar brenda për shkak të virusit dhe u largua nga shtëpia.
“Më vonë, viktima u kthye në shtëpi dhe filloi një përleshje fizike midis të dyshuarit dhe viktimës,” tha zëdhënësi i policisë Steve Avery.
Njerku qëlloi adoleshentin disa herë të mërkurën në mbrëmje. Djali u dërgua në spital ku më vonë u shpall i vdekur.
Hargrove u arrestua dhe u akuzua për vrasje. Një mik i viktimës tha se De’onte ishte “një djalë i mirë”.
Policia e Atlanta-s i këshillon njerëzit të evitojnë njëri-tjetrin në shtëpi nëse krijohen situata tensioni.
“Kur presionet rriten, ju duhet të merrni frymë thellë, të mendoni dhe të ndaleni. Situata është e vështirë. Njerëzit po qëndrojnë të gjithë në shtëpi”, thuhet në deklaratë.
