Për të 21-tin vit radhazi në Tiranë do të mbahet “Panairi i Librit 2018”, i cili nis më 14 nëntor për t’u mbyllur më 18 nëntor.
Ashtu si çdo vit Panairi i Librit është kthyer në një ngjarje të rëndësishme kulturore për vendin tonë dhe është përhapur edhe jashtë kufijve shqiptarë, duke mirëpritur personalitete apo lexues nga Kosova, Maqedonia apo Mali i Zi.
Ai do të ketë si objekt kryesor paraqitjen e botimeve më të mira të hedhura në qarkullim vitin e fundit.
Çdo ditë do të jetë e mbushur me aktivitete në stendat e Shtëpive Botuese, ku vihet re një vëmendje kushtuar librit për fëmijë dhe vogëlushëve.
15 nëntor – Shoqata e Botuesve Shqiptarë do të organizojë konferencën “Sfidat e leximit sot! Çfarë lexojnë të rinjtë në Shqipëri?”, në një panel diskutimi për të shkëmbyer mendime rreth promovimit të leximit dhe edukimit të lexuesve, fëmijë dhe të rinj.
17 nëntor, ora 12:00 – Do të organizohet edhe ceremonia e ndarjes së çmimeve të Panairit të Librit “Tirana 2018”.
Shoqata e Botuesve Shqiptarë ka vendosur të jepen 3 çmime: Autori i vitit 2018; Përkthyesi i vitit 2018; Libri më i mirë për fëmijë 2018.
Në konkursin për çmimet do të përfshihen në konkurs të gjitha botimet pas Panairit të 20 të Librit (domethënë dhjetor 2017-nëntor 2018).
Gjiithashtu priten të jenë të pranishëm shumë shkrimtarë të njohur dhe të pëlqyer si, Ismail Kadare, Flutura Açka, Albatros Rexhaj, etj.
Ky panair do të bashkojë të gjithë njerëzit, puna e të cilëve ka në epiqendër librin: autorë, botues, përkthyes, përfaqësues të shtypit dhe medias me qëllim zhvillimin e kontakteve midis tyre dhe promovimin e leximit në publikun e gjerë, veçanërisht te të rinjtë.
Burimi: Shoqata e Botuesve
