Ndërsa momenti i uljes së misionit Artemis II po afrohej, emocionet nuk ishin të pranishme vetëm në kapsulë, por edhe në Tokë, ku familjarët e astronautëve po prisnin me ankth dhe krenari rikthimin e tyre nga udhëtimi historik rreth Hënës.
Familja e astronautit kanadez Jeremy Hansen ishte ndër më të emocionuarat. Vajza e tij 20-vjeçare, Ashley Hansen, tregoi se nëna dhe vëllai i saj e ndoqën uljen nga Mission Control, ndërsa ajo vetë e përjetoi momentin nga Montreali, së bashku me motrën binjake.
“Do t’i jap një përqafim të madh. Mendoj se të gjithë do të habitemi që ia doli”, u shpreh Ashley, duke reflektuar emocionet e forta që shoqëruan pritjen e gjatë.
Ajo ndau gjithashtu një detaj prekës nga fëmijëria e tyre, një shprehje që familja e përdor prej vitesh: “‘Të dua deri në hënë dhe mbrapa’. Këtë e kemi thënë që kur ishim shumë të vegjël”, tha vajza e astronautit, duke i dhënë një kuptim edhe më të veçantë misionit të babait të saj.
Ashley kujtoi edhe një gjest simbolik të bërë nga babai i tyre në vitin 2023, kur u njoftua zyrtarisht misioni. Sipas saj, ai kishte përgatitur varëse të personalizuara për secilin anëtar të familjes, të zbukuruara me gurët e lindjes.
“Është në formë gjysmëhëne dhe ka të shkruar ‘hënë dhe kthim’. Është shumë domethënëse, sidomos duke pasur parasysh misionin në të cilin ai ndodhet tani”, tregoi ajo.
Tashmë që misioni ka përfunduar me sukses, familja pret me padurim ribashkimin dhe momentin kur do të dëgjojnë nga afër rrëfimin e plotë të kësaj aventure unike.
“Mendoj se kjo do të jetë historia më e madhe e të gjitha kohërave”, përfundoi Ashley, duke përmbledhur ndjenjat e një familjeje që përjetoi nga afër një moment historik për njerëzimin.
