Presidenti amerikan Donald Trump dhe Lideri i Koresë së Veriut Kim Jong lanë gjurmë në histori me shtrëngimin e duarve në takimin e shumëpritur.
Takimi i paqes mes dy kundërshtarëve të mëdhenj, që për pak e çuan botën në prag të një konflikti bërthamor, u realizua në ishullin e blinduar Sentosa-s, në Singapor, shkruan “BBC”.
Në një deklaratë për mediat pas takimit, Trump u shpreh se “lojrat me luftë” do të ndalen sepse ato janë jo vetëm shumë provokative, por edhe shumë të kushtueshme. Donald Trump i cilësoi bisedimet me liderin e Koresë së Veriut si të ndershme, të drejtpërdrejta dhe produktive.
“Ne të dy kishim dëshirë ta ndryshonim këtë situatë. Dhe kemi krijuar një lidhje shumë të veçantë mes nesh. Njerëzit do të surprizohen dhe do të jenë shumë të lumtur” – tregoi Trump në konferencën që u mbajt pesë orë pas takimit.
Trump dhe Kim Yong-un, firmosën një marrëveshje me anë të së cilës Koreja e Veriut premton të nisë procesin e denuklearizimit ndërsa SHBA garanton siguri për gadishullin korean.
Megjithatë, deklarata e firmosur nga të dyja palët nuk ka detaje konkrete dhe analistët shprehen se ajo ngjason me zotime të mëparshme të vitit 1994 dhe 2005, por ato janë shkelur për shkak të interpretimeve të ndryshme të palëve lidhur me kuptimin e “denuklearizimit”, shkruan “BBC”.
