Deri më tani e kemi treguar mbështetjen për dy futbollistët shqiptarë, Granit Xhakën dhe Xherdan Shaqirin, vetëm nëpërmjet rrjeteve sociale. FIFA mori dje vendimin duke i vendosur gjobë dy sportistëve, të cilët festuan me simbolin e shqiponjës pasi shënuan golat për Zvicrën në ndeshjen kundër Serbisë.
Por për të gjithë ju që doni të bëni më shumë sesa të komentoni apo të shkruani në Facebook dhe Instagram, keni një super mundësi. Kryeministri Edi Rama njoftoi hapjen e llogarive ku mund të kontribuojnë të gjithë tifozët apo atdhetarët për të shlyer gjobën prej 10 mijë frangash zvicerane, të vendosur për secilin prej tyre.
“MOS KINI FRIKË NGA SHQIPONJA është emri i llogarisë bankare ku gjithkush mund të japë një kontribut simbolik, për të paguar gjobën absurde të FIFA-s ndaj Granit Xhakës dhe Xherdan Shaqirit. Shenja e duarve shqiponjë është shenja jonë dalluese e komunikimit në raste gëzimi dhe me keqardhje për ata që e keqinterpretuan shenjën e gëzimit krejt spontan nga një moment i bukur sportiv, në Raiffeisen Bank është hapur llogaria MOS KINI FRIKË NGA SHQIPONJA. Kjo llogari u hap falë nxitjes së shumë miqve të këtij rrjeti social nga e gjithë bota, si falënderim e mirënjohje për dy sportistët që ngritën peshë në një gëzim sportiv miliona shqiptarë”, shkruhet në postimin e Ramës.
Tani e dini ju se çfarë duhet të bëni!
Burimi: Facebook
