Teksa ishte e ftuar në emisionin “Why Not” në muajin maj të këtij viti, këngëtarja e njohur Alida Duka rrëfeu se kishte gjetur dashurinë e jetës, me të cilin kishte në plan që të martohej.
Ajo ishte në një lidhje dashurie me një menaxher për artistët në mbarë botën, të cilin e përshkroi si “bosin e Francës”, pasi i kishte dhuruar një orë me 10 diamante.
Mirëpo, duket se dashuria e saj nuk ka zgjatur shumë, pasi Alida i ka dhënë fund kësaj marrëdhënieje.
Në një intervistë për “PanoramaPlus”, këngëtarja ka treguar se ishte ndarë nga menaxheri francez.
“Lidhja me francezin Xavier ishte një lidhje shumë e veçantë për mua, e cila la gjurme tek unë. Për këtë arsye publikova dhe këngën “Krejt me harru” para ca kohësh.”- rrëfeu ajo.
E pyetur pse iu drejtua me “ishte”, këngëtarja pranoi ndarjen:
“Dikush që nuk diti të vlerësojë vlerat që unë kam, nuk ka edhe pse të jetë me mua. Çdo gjë tjetër materiale nuk më hyn në sy, sepse e kam ndërtuar gjithçka vetë dhe jam krenare për këtë. Karakteri është mbi të gjitha, ajo çfarë unë vlerësoj shumë.”- u shpreh Alida.
Këngëtarja është nënë e një djali 21-vjeçar dhe ka treguar se nuk beson se do të sjellë në jetë një fëmijë të dytë.
