Të enjten që lamë pas, “Versace” dhe “Swarovski” më në fund kanë prezantuar Tiarën e mahnitshme në mbrëmjen prestigjioze të Ballos Vjetore në Vjenë.
Debutantet e veshura të gjitha me fustane të bardha dhe me Tiarën Swarovski në kokë, realizuan vallëzimin vjetor, i cili zgjati vetëm katër minuta por pati një rëndësi të madhe pasi ende shihet si një rit për përfshirjen në shoqëri të shumë grave të reja austriake.
Çdo gjë ishte e kuruar në detaj nga ushqimet e ofruara te muzika, ku veçojmë se në piano ndër të tjerë performoi Frantisek Dafi dhe Willi Klinger, ndërsa tenor mes të tjerëve ishte zgjedhur edhe Domenico Limardo.
Balloja e cila u mbajt në Wiener Staatsoper, çdo vit bashkon rreth 5.000 të ftuar nga bota e kulturës, biznesit, politikës dhe akademisë, mes të cilëve Wolfgang Sobotka, President i Këshillit Kombëtar Australian; Auma Obama, motra e ish-Presidentit Barack Obama dhe Doris Schmidauer, bashkëshortja e Presidentit Austriak, ish-presidenti i Parlamentit Evropian, Martin Schulz, komisioneri i BE-së, Johannes Hahn, bashkëshortja e Eros Ramazzotti-t, Marica Pellegrinelli.
Pjesë e kësaj balloje ishte edhe partnerja e “Swarovski-t” për Shqipërinë, znj. Dasha Frashëri, e cila ka sjellë ekskluzivitetin e markës në Shqipëri prej vitit 1996.
Znj. Frashëri shijoi nga afër magjinë e tiarës së përbërë nga 380 kristale dhe e prezantuar nga 140 debutantet e reja, ndërsa përcolli për “iconstyle.al” disa nga momentet më mbresëlënëse të eventit.
Në mesin e të ftuarve VIP përmendin edhe supermodelen Elle Macpherson, e cila ishte e ftuara speciale e Richard ‘Moerte’ Lugner, një ndër figurat më të njohura të shoqërisë së lartë të Vjenës.
Balerinët e State Opera Ballet dhe pjesëmarrësit performuan në ceremoninë hapëse të Ballos tradicionale Vieneze. Tradita e muzikës klasike u ndërthur me shkëlqimin e Swarovski-t për të dhuruar një atmosferë fantastike dhe të paharrueshme për të ftuarit, të cilët ishin kujdesur për të sjellë me vete aksesorët unikë nga koleksionet mahnitëse të “Swarovski”-t.
Frymëzimi për Tiarën lindi nga “Das Rheingold”, drama e parë muzikore pjesë e tetralogjisë së Richard Wagner “Der Ring des Nibelungen”, (Unaza e Nibelung), e cila u performua si një opera e vetme, në Teatrin Kombëtar të Mynihut më 22 shtator 1869.
“Jam shumë krenare që kam punuar me Donatella Versace për krijimin e Tiarës”, tha pak para mbrëmjes, Nadja Swarovski, e cila është femra e parë që vendoset si drejtuese në bordin ekzekutiv të “Swarovski”-t.
Dhe jo vetëm Versace, pasi partneritetin me “Swarovski”-n e kanë kërkuar dhe vlerësuar shtëpitë më të mëdha të modës dhe stilistët e mirënjohur, duke nisur nga i ndjeri Karl Lagerfeld dhe për të vijuar me Alexander McQueen, Philip Treacy, Christopher Kane dhe shumë të tjerë.
