Ylli i Tenisit, Novak Djokovic ka pranuar se nuk u izolua menjëherë pasi doli pozitiv me Covid-19 muajin e kaluar – por mohoi se kishte virusin kur merrte pjesë në ngjarje publike.
Në një deklaratë të publiukar në rrjete sociale, ai gjithashtu kërkoi falje për një deklaratë të rreme, duke thënë se ajo ishte dorëzuar në emër të tij nga një anëtar i stafit të tij mbështetës dhe ishte një “gabim njerëzor”.
Djokovic shtoi se ai kishte bërë një “gabim gjykimi” kur bëri një intervistë për media dhe një set fotografik me një gazetë sportive franceze pasi ai kishte rezultuar pozitiv.
Gazetarit dhe fotografit që punonin për L’Equipe nuk iu tha se Djokovic ishte pozitiv me Covid para, gjatë ose pas intervistës me yllin e tenisit në Beograd, sipas raportimeve të gazetës sportive franceze.
Ndërkohë zyrtarët e “Forcave Kufitare Australiane” (ABF) po hetojnë mospërputhjet e mundshme në dokumentet në lidhje me rezultatin “PCR” të dhjetorit që kanë marrë nga Novak Djokovic, si dhe lëvizjet e tenistit në ditët pasi ai rezultoi pozitiv për Covid-19 në Serbi.
Sipas një burimi për “CNN”, Forca Kufitare Australiane nuk ka përcaktuar ende nëse këto çështje mund të ndikojnë në vlefshmërinë e vizës aktuale australiane të tenistit.
