Ervis Zefi, djali që dikur ka jetuar në të njëjtën jetimore në Shkodër së bashku me vajzën e abuzuar, Adrianën, ka konfirmuar sot historinë e saj.
Në një lidhje direkte me emisionin “Shqipëria live”, ai ka rrëfyer ngacmimet seksuale dhe dhunën që i ushtrohej fëmijëve të jetimores.
“Historia e Adrianës është shumë reale sepse kam qenë vetë aty. Roja i jetimores i kapte gjoksin vajzave, i gjuante në të ndenjura. Adrianën e ka kapur prej flokësh dhe e ka futur te kaldaja. Personeli fuste fëmijë më të rritur se ne për të na rrahur. Roja i natës rrihte edhe fëmijë me nevoja të veçanta. Mësuesit e shkollës e dinin për dhunën e ushtruar.
Që në 2003 e deri në 2007-n kam qenë me të. Unë i di të gjitha gjërat që kanë ndodhur aty. Nuk heq as pikë e as presje nga historia e Adrianës. Në vitin 2003 kushtet nuk kanë qenë aspak të mira dhe ka patur dhunë nga personeli. 5 persona mund të kenë qenë të mirë, shumica e personelit dhunonte psikologjikisht dhe fizikisht. Na rrihnin, na linin me një këmbë.”-ka treguar ai.
Gjithashtu, ai ka shtuar se psikologia që shokoi publikun, Antonjeta, nuk ka qenë e pranishme në atë periudhë te shtëpia e fëmijës në Shkodër.
“E njoh Antonjetën, por jo personalisht. Ajo na thoshte se nuk merrem me kopilat e shtëpisë së fëmijës. Një psikologe nuk mund të dalë e të flasë ashtu. Ajo nuk ka qenë asnjëherë e pranishme dhe nuk na ka folur për dhunën apo për përdhunimin”-ka treguar Zefi.
I riu ka shtuar edhe një sqarim lidhur me pjesën e abuzimit të profesorit të fesë islame.
“Dua të them diçka për pjesën e profesorit të fesë islame. Ai nuk ka qenë një përfaqësues i fesë islame ose i veshur si i tillë. Ka qenë thjesht një mësues i devotshëm ndaj fesë. Antonjeta tha qe nuk ka pasur profesor të fesë islame, por në fakt ka patur”- ka thënë djali.
Për më tepër, ai ka denoncuar me emra abuzuesit dhe është shprehur se është i gatshëm që rrëfimin e tij ta thotë edhe në polici.
