Rusia nisi ditën e enjte sulmet ushtarake në Ukrainë, duke u futur nga jugu, lindja dhe veriu.
Bomba e raketa të ndryshme janë parë duke fluturuar nëpër qiell, ndërsa një gjë e tillë nisi nga urdhëri i presidentit rus, Vladimir Putin.
Sot Ukraina ka hyrë në ditën e tetë të luftës dhe gjërat sa vijnë e bëhen më serioze.
Gjatë orëve të fundit pritet që Rusia dhe Ukraina të nisin një raund të dytë bisedimesh. Raundi i parë u zhvillua të hënën në kufirin bjellorus dhe zgjati pesë orë.
Gjendja në Kiev është bërë edhe më e rëndë. Forcat ruse po lëvizin drejt kryeqytetit të Ukrainës. Trupat mund të “rigrupohen” ose të përballen me sfida të tilla si mungesa e furnizimit dhe rezistenca e Ukrainës.
Gjithashtu mësohet se trupat ruse kanë pushtuar qytetin Kherson, në jug të Ukrainës, një javë pasi filloi lufta. Ky qytet ka 290,000 banorë dhe vitin e kaluar mbajti stërvitje luftarake të mbështetura nga NATO.
Por kjo nuk është më e keqja, pasi qyteti i dytë më i madh i Ukrainës, Kharkiv, u përball me bombardime intensive të mërkurën, duke nisur nga sulmet me raketa ruse që goditën të paktën tre shkolla, një katedrale dhe dyqane.
Kjo ka sjellë që një milion njerëz të largohen nga Ukraina në vetëm një javë, sipas të dhënave të OKB-së.
Asambleja e Përgjithshme e Kombeve të Bashkuara ka votuar me 141 vota rezolutën e mbështetur edhe nga Shqipëria, e cila dënon pushtimin rus në Ukrainë “në termat më të fortë të mundshëm”. Votimi ishte 141 vende në favor dhe pesë vende ishin kundër tij, me 35 vende të tjera që abstenuan. Serbia ishte një nga vendet që votoi pro rezolutës.
