Ministri i Turizmit dhe Mjedisit Blendi Klosi ishte i pranishëm ditën e sotme në Prishtinë, ku nënshkroi një marrëveshje turistike me palën kosovare.
Palët ranë dakord që edhe sivjet të kenë një ofertë të përbashkët turistike, ndërsa ministri Klosi në fjalën e tij ka kërkuar nga qytetarët e Kosovës që këtë vit të zgjedhin bregdetin shqiptar për të kaluar pushimet verore.
Ministri ishte i shoqëruar nga kryebashkiakët e Vlorës dhe Lezhës, Dritan Leli dhe Pjerin Ndreu, teksa në takim ishte edhe presidenti i Kosovës, Hashim Thaçi, me të cilin konsumoi diçka në një lokal.
Mirëpo, pavarësisht se ditët e fundit numri i rasteve të reja me Covid-19 ka qenë tejet i lartë, duket se për ta këto shifra nuk përbëjnë asnjë shqetësim.
Nga fotot e publikuara, shihet se ata janë ulur ngjitur me njëri tjetrin, ndërsa nuk kanë as maskë mbrojtëse, duke mos respektuar masat e rekomanduara nga ekspertët.
Aktualisht në Shqipëri numri i të prekurve nga Covid-19 ka shkuar në 1838, kurse në Kosovë 1916.
