Policia e Shtetit ka reaguar për protestën e qytetarëve të zhvilluar në Tiranë për vrasjen e 25-vjeçarit Klodian Rasha nga efektivët.
Në njoftimin për shtyp blutë theksojnë se në protestë janë plagosur 9 efektivë, 3 prej të cilëve ndodhen në gjendje më të rëndë në spital, pasi kanë dëmtime serioze në kokë dhe në trup.
Mes të tjerash, policia deklaron se “protesta nuk mund të përdoret si pretekst për të ushtruar dhunë të verbër, për të plagosur rëndë punonjësit e Policisë së Shtetit dhe shkatërruar pronën publike dhe private”.
Nga ana tjetër ka reaguar edhe Ministria e Shëndetësisë që raporton se njëri prej policëve të plagosur në protestën e sotme në Tiranë rrezikon të humbasë syrin, për shkak të plagëve të rënda që ka marrë.
Sipas MSH, gjithsej janë plagosur 8 policë dhe 2 protestues, të cilët po marrin trajtim në spital. Në spitalin e Traumës po trajtohen aktualisht 7 punonjës të policisë dhe 2 protestues në gjendje të stabilizuar.
Ndërsa në Qendrën Spitalore Universitare “Nënë Tereza” po trajtohet efektivi i cili pritet t’i nënshtrohet ndërhyrjes kirurgjikale.
Urgjenca Kombëtare dhe strukturat shëndetesore vijojnë te jenë në gatishmëri të plotë deklaron ministria e Shëndetësisë.
