Një ndër emrat më të rinj të skenës shqiptaret është ai i Diona Fonës. Krahas këngëve të suksesshme, ajo është komentuar shpeshherë për paraqitjen e saj.
Së fundmi, ajo ka arritur një sukses të madh jashtë muzikës duke u bërë imazh i markës ‘Fenty Beauty’, linjës kozmetike të yllit nga Barbados, Rihanna.
Imazhi i këngëtares shqiptare u shfaq imazh në faqet zyrtare dhe në rrjetet sociale të kësaj marke.
Kujtojmë se para pak ditësh, Rihanna hyri zyrtarisht në grupin e miliarderëve. Sipas “Forbes” pasuria e saj ka arritur në 1.7 miliardë dollarë, duke u bërë edhe këngëtarja femër më e pasur në botë. Ndërsa në industrinë e argëtimit ajo renditet e dyta, sepse në vendin e parë si gruaja më e pasur është Oprah Winfrey.
Rihanna ka fituar 1.4 milionë dollarë vetëm nga kompania Fenty Beauty, ku ka 50% të aksioneve. Pjesa tjetër e pasurisë, rreth 270 milionë dollarë ajo i ka fituar nga karriera e saj artistike si këngëtare dhe aktore, së bashku me shitjet nga linja e të brendshmeve, Savage x Fenty.
Sipas “Forbes” Rihanna ka arritur një sukses të jashtëzakonshëm me “Fenty Beauty” jo vetëm për shkak të famës së saj, por edhe produkteve të shumëllojshme. Vetëm një fondatinë vjen në 50 lloje të ndryshme ngjyrash për të gjitha gratë. Një sipërmarrje e përbashkët 50-50 me konglomeratin luksoz francez LVMH, i cili gjithashtu zotëron markat e grimit si Sephora, Fenty Beauty, thuhet se ka fituar 550 milionë dollarë gjatë vitit të parë kalendarik në 2018, duke mposhtur linjat e tjera të famshme si Kylie Cosmetics të Kylie Jenner dhe KKW të Kim Kardashian West.
Linja Savage x Fenty po ashtu ka rezultuar një sukses, duke mbledhur 115 milionë dollarë në shkurt të vitit të shkuar. Kompania, e themeluar po ashtu në vitin 2018, është një ndërmarrje e përbashkët me TechStyle Fashion Group, ku Rihanna ka 30% përqind të aksioneve.
