Pavarësisht se ndahesh, disa gjëra nuk mund të fshihen menjëherë nga mendja jote dhe një prej tyre lidhet pikërisht me datat. “Ja kjo ishte dita kur u puthëm për herë të parë” apo “Si sot 2 vite më parë u lidhëm”, janë disa nga kujtimet që do të harrohen vetëm me kohën.
Por me siguri vajza, ashtu si unë, një nga ditët që ju vendos më shumë para dilemës është dita e tij e lindjes: Duhet apo jo ta uroj?
Duket sikur kalendari të kujton gjithë ditën se sot nuk është një 24-orësh i zakonshëm. “Facebook” të sjellë njoftim sapo ora shënon 00.00 se kush ka ditëlindjen dhe si të mos mjaftonte kjo, të rikthen kujtimet me foto. Pikërisht në ditë të tilla do të doje që mos të ishin shpikur kurrë rrjetet sociale.
Okej, askush nuk është fajtor për atë që kaluam bashkë, por e vetmja gjë që duhet të bëj tani është të shuaj dilemën. Dhe këto raste nuk janë “të prera me thikë”, pavarësisht se nuk dua të bëj “mbretëreshën e dramës”. Nëse keni kaluar në një situatë të tillë ose ndodheni pikërisht kështu sot, atëherë do ta bashkoheni me siguri në “hallin” tim.
Pse duhet t’i shkruaj?
Pyetja e parë që i bëra vetes ishte motivi i këtij mesazhi: çfarë dua të arrij me këtë veprim? Mund të jetë thjesht një urim miqësor, por nga ana tjetër mund të dukem sikur kërkoj vëmendjen e tij apo diçka më shumë. Unë jam e sigurt, është vetëm një mesazh miqësor, po ti a je e sigurt?
Kur ishim bashkë, si ndikoi te unë?
Ditëlindja e tij është pikërisht nga ato ditët që të kujton kohën e kaluar bashkë dhe ashtu si unë me siguri mendon: Si ishte për mua? Nuk ka ndarje pa dhembje, por nëse mes gjithë atyre sherreve, sërish kujton të mirën që keni lënë pas, atëherë pse mos ta urosh?!
Ku jemi tani?
Nëse gërmojmë në të kaluarën, përgjithësisht kemi frikë se mos rizgjojmë ndjenja të vjetra… Unë jo!
Ku jam me jetën time? Po shijoj momentin dhe ndonjë flirt, ende jo në kërkim të “të duhurit”. Ku është ai? Nuk e di dhe nuk më intereson ta di. Megjithatë, sërish e ndjej se mes nesh ka mbetur një lloj miqësie.
Ju përgjigjja tre pyetjeve me shumë siguri dhe e qartë në mendjen time, ndaj jam gati për të shkruar mesazhin e urimit. Por nëse ke pak mëdyshje, atëherë kujtohu se sot është një ditë si gjithë të tjerat dhe lërjani nënës së tij t’i bëjë kartolinën e ditëlindjes.
Burimi: Iconstyle.al
