Në një kohë që të gjithë personazhet e njohur shqiptarë i janë bashkuar misionit për të ndërgjegjësuar publikun për t’u mbrojtur nga Koronavirusi, Robert Berisha ka bërë gafën e radhës!
Këngëtari shqiptar ka bërë së fundi një postim super racist në Instastory-n e tij, ku ka publikuar një avion të linjës ajrore kineze, për të cilin shkruan:
“Veç më vjen keq për Bruce Lee, se këtyre lakuriqëve, bombë atomike në gojë!”
Roberti më pas e ka fshirë postimin, por nuk mund të fshijë nga mendjet tona nivelin e frikshëm të injorancës që përcjell me këto postime.
Të fajësosh popullin kinez për Koronavirusin dhe të kërcënosh hapur në një profil publik Instagrami, ku të ndjekin shumë të rinj e të reja, është thjesht e pafalshme!
Nuk e dimë se në kë planet jeton Roberti, por le t’i kujtojmë që aktualisht: Virusi është armiku ynë, jo Kina e as kinezët!
Por kjo nuk është hera e parë që këngëtari Robert Berisha ka habitur me postimet e tij, pasi pak ditë më parë ai publikoi fjalët e tij të cituara nga një fans:
“Nuk je shqiptar i vërtetë nëse frikësohesh nga Koronavirusi”!
Në një periudhë të vështirë që çdokush e përjeton me frikë për veten dhe të afërmit, duhet treguar një kujdes i veçantë, pasi të qenit shqiptar nuk të bën imun ndaj Koronavirusit.
Këto folklorizma qesharake që nuk i hyjnë në punë askujt, nuk të mbrojnë nga virusi i cili nuk kursen askënd në këtë periudhë.
Por gafat e Robert Berishës nuk kanë fund! Mjafton të përmendim deklaratën e tij në janar kur tha se nuk ka asgjë të keqe, nëse një mashkull ka dashnore dhe e lë gruan e tij në shtëpi!
Roberti harroi se është biri i një nëne, babai i një vajze dhe për të mos folur për ish-partneren e tij Nora Istrefi, e cila sipas teorisë alla Robertiane, duhej t’i rrinte burrit gati e të mos bënte gabime për të mos e humbur!
“Ruajini burrat ose rrini gati, që të mos shkojë puna te dashnorja! Unë mendoj që një mashkull i suksesshëm, që e mbush frigoriferin mirë, që e sheh gruan mirë, që i ka të gjithë të mirat gruaja e vet dhe fëmijët gjatë dimrit dhe verës, çfarë ka ndonjë problem aty që paska ai dashnore? Rritni fëmijët, shkoni me pushime, hani, pini, duajeni burrin, rrijini gati dhe ndoshta nuk e rrit numrin e dashnoreve. Sa më shumë gabime që bëni tek shtëpia, rritet numri i dashnoreve. Kështu që bëhuni të mençura. O zvogëlojani numrin, o ja hiqni krejt ato. Krejt varet prej jush”, shprehej Roberti.
Këngëtari kërkoi falje më pas dhe tha se pa dashur me deklaratën e tij ka ofenduar edhe femrat e familjes, përfshirë nënën, Norën dhe vajzën Renee.
Por me sa duket Roberti nuk po vë mend!
/Iconstyle.al
