Madonna humbi betejën për të ndalur shitjen në ankand të një letre dashurie të shkruar në burg nga reperi Tupac Shakur, bashkë me sendet personale. Ikona e muzikës pop paraqiti një urdhër emergjent korrikun e vitit të kaluar për të ndaluar shitjen e letrës, fotove, një krehëri flokësh dhe të një palë mbathjve të veshura prej saj.
Një gjykatës i Nju-Jorkut hodhi poshtë padinë e yllit të pop-it kundër Darlene Lutz, me argumentin se statusi i kufizimit për të rimarrë sendet e saj ka skaduar.
Një prej sendeve është edhe letra e ndarjes nga reperi Tupac, i cili ndërroi jetë në vitin 1996 dhe me të cilin Madonna ka pasur një lidhje sekrete.
Ankandi për këto sende do të zhvillohet në korrik, sipas asaj që raporton faqja e internetit “TMZ”.
Madonna pretendonte se nuk e dinte që Lutz ka qenë në zotërim të letrës së Tupac Shakur të vitit 1995, derisa dëgjoi mbi një ankand online të vitit të kaluar.
Në një letër emocionuese, legjenda e reperit thoshte se të qenit pranë një njeriu me ngjyrë vetëm mund ta ndihmonte karrierën e saj, ndërsa imazhi i tij do të dëmtohej nga fakti se ishte i lidhur me një grua të bardhë.
Ish-çifti ka pasur një marrëdhënie sekrete, mbi të cilën Madonna ka folur hapur vetëm gjatë kohëve të fundit.
“Këngëtarja dhe Lutz, dikur mikesha, janë zënë që prej vitit 2003, e pasi zgjidhën një mosmarrëveshje ligjore mbi artin vitin pasardhës, Madonna nënshkroi lirimin nga të gjitha pretendimet mbi “çdo gjë” ndaj ish-shoqes së saj”, thekson gjykatësi Gerald Lebovits në vendimin të bërë publik gjatë së hënës.
“Ylli i pop-it nuk mund të ngrejë më padi mbi sendet që janë subjekt i ankandit”, vijon më tej vendimi.
