Debati i nisur nga gazetari Mustafa Nano në emisionin e tij “Provokacja” mbi etikën e veshjes në ekranin televiziv, duke marrë si shembull dy gazetaret sportive, Ilda Bejlerin dhe Bora Zemanin vazhdon të diskutohet ende. Komentet e Nanos u kthyen në sulme personale për Ilda Bejlein, e cila ka reaguar në çdo dalje të saj publike, ndërsa Bora e kaloi në heshtje.
Mbrëmjen e djeshme ka reaguar edhe “Digitalb” me një deklaratë zyrtare lidhur me këtë temë. Në deklaratën e cila është bërë publike në emisionin “Top Show Magazine” thuhet se ky është një debat i ngritur gabimisht dhe nëse ka diçka për t’u kritikuar në veshjen, sjelljen, gazetarinë, regjinë e transmetimit apo edhe të çfarëdo elementi tjetër të një emisioni përgjegjësia është e medias përkatëse dhe debati e kritikat i duhen drejtuar asaj.
“Së pari, ai është një debat i ngritur gabimisht mes një joprofesionisti të fushës dhe një moderatoreje, kur duhej të ishte një profesionisti e një televizioni.
Nëse ka diçka për t’u kritikuar në veshjen, sjelljen, moderimin, gazetarinë, regjinë, cilësinë e transmetimit a të panelit, apo dhe të çfarëdo elementi tjetër të një emisioni, përgjegjësia është e medias përkatëse dhe debati e kritika duhet drejtuar drejt saj. Televizioni, për ata që janë profesionistë të fushës, është puna e një grupi njerëzish, ku përgjegjësitë nuk i mban vetëm ai që del në ekran, por krejt ekipi që punon për të realizuar një produkt televiziv.”, reagon ‘Digitalb’.
Më tej, në deklaratë thuhet se Bejleri nuk është thjesht moderatore por edhe imazh i “Digitalb”-it dhe cilësitë e saj nuk mund të merren të veçuara nga njëra tjetra.
“Së dyti, për rastin konkret, moderatorja e sulmuar, Znjsh. Ilda Bejleri është njëkohësisht gazetare, moderatore dhe imazh. Në performancën e saj televizive, ajo i sjell të tria këto cilësi në ekran, sepse të tria janë pjesë e punës dhe personalitetit të saj. Gjykimi i vetëm njërit element të shkëputur nga të tjerët është thjesht dëshirë për protagonizëm, duke nxjerrë atë element jashtë së tërës.
Së treti, DigitAlb, në tërë produktet e veta ndjek nga afër modelet dhe standardet më të mira europiane, qofshin ato teknologjike dhe kreative. Ndërthurja e cilësisë së përmbajtjes me një imazh sa më bashkëkohor, e që të vijë sa më pranë nevojave të publikut të dekadës së dytë të mijëvjeçarit është sfida jonë kryesore, të cilën e marrim me shumë seriozitet.”, vijon më tej deklarata.
Sakaq në këtë reagim zyrtar, “Digitalb” e konsideron Nanon një gjitholog ndërsa shton se pikërisht nga këta persona vuan sot televizioni shqiptar.
“Së fundi, televizioni shqiptar ka shumë nevojë për debat, një debat të hapur, publik dhe pa kompromise. Televizioni shqiptar vuan nga mungesa e profesionistëve dhe zëvendësimi i tyre me surrogat në moshë të vonuar; vuan nga seksizmi pa profesionalizëm dhe imazhi pa përmbajtje; vuan nga gjithologët që flasin për gjithçka dhe që dalin në çdo studio, e së fundmi edhe si moderatorë programesh, e cila po bëhet një tendencë; nga varfëria e ideve të personaliteteve atelevizive; vuan nga të vjetrit që nuk i lënë vend të rinjve; por mbi të gjitha vuan sepse televizionin e bëjnë ata që nuk e njohin televizionin.
Për të tëra këto ka shumë nevojë për debat, veçse ky debat duhet të vijë nga profesionistët dhe ata që e njohin fushën. Një debat i nisur vetëm për audiencë personale dhe me sulme personale nuk i ndihmon askujt, madje as atij që e nis”, përfundon deklarata.
