Ish-producenti dhe artisti i njohur amerikan Sean ‘Diddy’ Combs do të dalë këtë të hënë përpara gjykatës federale në Manhattan, për një proces të profilit të lartë ku përballet me akuza të rënda si trafikim seksual me dhunë apo shantazh, organizim aktivitetesh të paligjshme, dhe rekrutim të grave për qëllime seksuale.
Sipas prokurorisë, këto akuza janë ngritur nga katër persona anonimë, që pretendojnë se janë abuzuar seksualisht dhe kërcënuar nga Combs dhe rrethi i tij i afërt. Detajet e akuzave përfshijnë organizimin e asaj që quhej “party të shfrenuara” – festa të mbushura me drogë, ku gratë supozohet se detyroheshin të kryenin marrëdhënie seksuale me punonjëse seksi, shpesh të filmuara pa pëlqimin e tyre, ndërkohë që Combs i shikonte.
Sipas prokurorëve, Combs dhe bashkëpunëtorët e tij përdornin kërcënime përmes shantazhit financiar apo dhunës fizike për të mbajtur viktimat të heshtura. Ai akuzohet se përdorte ndikimin dhe famën për të joshur njerëz me premtimin e suksesit në karrierë, ndërsa më pas ushtronte kontroll të plotë mbi jetët e tyre, përfshirë vendbanimin dhe kujdesin shëndetësor.
E kaluara problematike e Diddy-t dhe përballja me drejtësinë
55-vjeçari, i njohur për suksesin e tij në industrinë muzikore dhe bashkëpunimet me artistë si Mary J. Blige, Usher e Notorious B.I.G., është përballur edhe më parë me akuza të rënda. Ish-partnerja e tij, Cassie Ventura, paditi Combs në vitin 2023 për përdhunim, trafikim dhe dhunë fizike, rast i cili u mbyll me një marrëveshje jashtë gjykate. Por pas kësaj padie, dolën edhe dhjetëra akuza të tjera civile nga gra të ndryshme, duke sjellë vëmendje të madhe ndaj sjelljes së tij të kaluar.
Në shtator 2024, Combs u arrestua në New York mbi bazën e një aktakuze që e akuzonte për drejtimin e një “organizatë kriminale” që përfshinte përdhunime, shfrytëzim seksual dhe përdorim droge për të manipuluar viktimat. Prokurorët pretendojnë se gjatë hetimeve janë sekuestruar pajisje elektronike që përmbajnë video të këtyre akteve, si dhe armë zjarri dhe sasi të konsiderueshme substancash narkotike.
Procesi gjyqësor dhe pritshmëritë
Gjykimi, që pritet të zgjasë deri në tetë javë, do të udhëhiqet nga gjykatësi federal Arun Subramanian. Përfaqësues të prokurorisë janë figura me përvojë, përfshirë Maurene Comey, vajza e ish-drejtorit të FBI-së, si dhe disa nga avokatet që kanë ndjekur raste të tjera të profilit të lartë si ai i Ghislaine Maxwell.
Pala mbrojtëse drejtohet nga avokati Marc Agnifilo, i njohur për mbrojtjen e personazheve si Keith Raniere (kreu i kultit seksual NXIVM) dhe Martin Shkreli. Ai ka deklaruar se videot e siguruara nga prokuroria tregojnë marrëdhënie konsensuale dhe jo prova për trafikim apo abuzim.
Ndër dëshmitarët kryesorë për prokurorinë pritet të jetë Cassie Ventura, ndërsa emrat e tjerë mbahen të fshehtë për arsye sigurie dhe mbrojtjeje të identitetit. Combs, i cili është arrestuar dhe po mbahet në qendrën e paraburgimit në Brooklyn, është përpjekur disa herë të dalë me kusht, por gjykata i ka refuzuar kërkesat.
Nëse shpallet fajtor, ai përballet me dënim të përjetshëm. Procesi pritet të jetë një nga më të ndjekurit e vitit në SHBA, për shkak të rëndësisë së figurës publike të Combs dhe akuzave të rënda që rëndojnë mbi të.
