Gjykata e Tiranës ka lënë në burg Deni Selimllarin, djalin e Valbona Selimllarit, i cili pak ditë më parë dhunoi një efektiv policie së bashku me vëllanë. Ky i fundit, është lënë në masën ‘detyrim paraqitje’ nga Gjykata. Ata u arrestuan në orët e para të mëngjesit të 4 tetorit.
Ata goditën për shkak të detyrës një efektiv policie, ndërsa kur janë shoqëruar në ambientet e dhomave të shoqërimit të Komisariatit të Policisë Nr. 2, kanë thyer kamerën e sigurisë dhe kanë dëmtuar derën e dhomës së shoqërimit. Sipas policisë, ata kanë kanosur edhe punonjësit e policisë që ndodheshin në këto ambiente.
Si ndodhi ngjarja?
Deni dhe Kejni Selimllari, përkatësisht 21 dhe 18 vjeç, u arrestuan në orët e para të mëngjesit të se shtunes pas një incidenti të dhunshëm në zonën e Bllokut, në kryeqytet.
Të rinjtë ndodheshin në një lokal nate në Bllok, në gjendje të dehur, kur nisën të bërtisnin dhe të shqetësonin klientët e tjerë dhe stafin. Sipas burimeve policore, kamarierët janë detyruar t’i nxjerrin jashtë për shkak të sjelljes së tyre agresive, por edhe jashtë lokalit, vëllezërit kanë vijuar me britma, zhurma dhe ofendime në rrugë.
Një efektiv policie, i cili ndodhej pranë vendngjarjes, është përpjekur të ndërhyjë për të qetësuar situatën, por është sulmuar fizikisht nga të rinjtë. Ata e kanë ofenduar dhe më pas e kanë goditur me grushte efektivin, duke e detyruar Policinë të kërkojë përforcime.
Menjëherë në vendngjarje ka mbërritur patrulla e Komisariatit Nr. 2, e cila ka ndërhyrë për të shoqëruar Deni dhe Kejni Selimllarin në ambientet e komisariatit. Por edhe pas shoqërimit, sjellja e tyre ka mbetur agresive. Burime brenda Policisë bëjnë me dije se dy të rinjtë kanë thyer një kamerë sigurie, kanë dëmtuar derën e dhomës së shoqërimit dhe kanë kërcënuar punonjësit e policisë.
