Rreth 15 persona sulmuan televizionin “Zjarr TV” mbrëmjen e së enjtes, duke plagosur edhe pronarin e tij.
Gazetari dhe pronari i televizionit, Ismet Drishti, u sulmua me leva nga disa persona të maskuar, ndërsa ka treguar për “newsbomb.al” detajet e incidentit:
“Ishin rreth 15 vetë, të gjithë me kapuça e me maska. Fillimisht kanë gjuajtur televizionin. Unë dola menjëherë. U konfrontuan dhe me mua, më shqyen rrobat e gjithçka. Lajmërova policinë, me erdhën vetëm dy policë. Kur bëra ca telefonata më sollën furgon policie.
Ndërkohë që deri në 12.00 të natës furgoni i policisë ka qenë këtu, por ajo që më shqetëson është se biznesi përballë ka kamera. I kam marr në telefon sot dhe u kam thënë që të vijnë të shohin kamerat dhe të evidentojnë autorët, akoma nuk kanë ardhur. Ndoshta kanë qenë edhe grup adoleshentësh, përdorues hashashi.
Nuk kemi pasur konflikt me askënd, ndaj dyshoj se kanë ardhur posaçërisht për televizionin dhe çuditërisht, askush nga policia nuk lëviz as sot për të marrë kamerat”.
