Lorenc Rrapa, babai i djalit të mitur të dyshuar për abuzim nga edukatorja në një kopësht, ka folur për shqetësimet e tij në një intervistë për Euronews Albania. Ai ka theksuar se djali i tij ka kaluar një eksperiencë traumatike dhe se tashmë kërkon një mjek psikolog për të trajtuar pasojat e dhunës psikologjike dhe fizike që ka përjetuar.
“Po kërkoj një mjek psikolog në shtet për të trajtuar djalin tim, por deri tani nuk kam arritur të gjej një zgjidhje,” u shpreh ai, duke shtuar se gjendja e djalit të tij nuk është normale dhe se ai është dhunuar në mënyrë të dyfishtë, psikologjikisht dhe fizikisht.
Lorenci tregon se ka bërë përpjekje për të siguruar ndihmë profesionale për djalin e tij, duke kërkuar një punonjës social ose psikolog në Qendrën Administrative nr. 14, por ende nuk ka gjetur një zgjidhje, pasi ata janë ose të angazhuar ose me pushime. Kjo ka shtuar më shumë presion dhe frustrim për të.
Ai gjithashtu ka denoncuar presionin që ka ushtruar vëllai i Rudina Gërdanit, edukatores që dyshohet se ka abuzuar me të miturin, duke theksuar se ka kaluar shumicën e kohës në Komisariatin e Policisë nr. 6, ku ka bërë kallëzim për këto presione.
Një tjetër shqetësim i Lorencit është që edukatorja Rudina Gërdani ende nuk është arrestuar, pavarësisht se kanë kaluar 48 orë nga denoncimi i rastit. Ai theksoi se oficeri i policisë i kishte shpjeguar se ata janë duke punuar për arrestimin, por nuk kishte ende asnjë rezultat konkret.
Lorenci ka bërë të qartë se është i vendosur të kërkojë drejtësi për djalin e tij dhe të sigurojë që ky rast të marrë fund sa më shpejt, ndërsa ka kërkuar mbështetje nga institucionet për të siguruar shëndetin dhe sigurinë e fëmijës së tij.
