Ashtu siç u paralajmërua, dhjetëra qytetarë, nëna e gjyshe kanë dalë në protestë pranë Ministrisë së Arsimit për të dënuar rastin e rëndë të dhunimit të 3-vjeçares nga edukatorja në kopshtin privat pa licencë ‘Stinët’.
Mes thirrjeve për më shumë siguri për fëmijët e tyre në kopshtet dhe çerdhet private, një prej protestueseve kërkoi përgatitje dhe kualifikim për edukatoret që kujdesen për të vegjlit e tyre.
“Jam shumë e indinjuar për atë që i ndodhi fëmijës. Prokuroria duhet ta fusë brenda edukatoren. Nuk mund të punohet pa licencë në mes të Tiranës. Ku janë organet kompetente? Duhet patjetër kontrolle në kopshte dhe çerdhet private. Këtë të shohë ministria. Këtu fillon edukimi dhe prandaj bëhet çdo gjë. Merren edukatoret dhe nuk dihet përgatitja ose profili i tyre. I kam bredhur me radhë çerdhet, të gjitha thonë se nuk kanë diploma për këtë punë”, është shprehur njëra prej protestueseve.
“Unë jam tre herë gjyshe. Kam ardhur këtu dhe jam shumë e indinjuar për fëmijën 3 vjeçar. Çfarë bën sot shteti. Si ky kopsht është pa liçencë. Ku është shteti. Jemi shumë të indinjuar. Ku do rritet fëmija, ka trauma të papara. Ajo të futet brenda. Edukatoret të shkojnë me mend në kokë”, ka thënë një tjetër.
“Insitucionet duhet të jenë përgjegjëse. Duhet të ketë teste për të gjitha edukatoret që merren në punë. Ishte një mjedis shumë i vogël. Opinioni publik duhet të ushtrojë presion ndaj institucioneve arsimore”, u shprehën një tjetër.
