Dhjetëra lëkundje tërmeti janë ndjerë në 24 orët e fundit në vend, duke i shqetësuar të gjithë teksa po afron koha e tragjedisë së madhe të tërmetit të nëntorit.
Por sizmologu Rrapo Ormeni tha për Syri.net se qytetarët nuk duhet të kenë frikë, pasi tërmetet e fundit nuk kanë lidhje me tërmetin e Durrësit.
Ai u shpreh se pas tërmetit të nëntorit, tani njerëzit janë më të ndjeshëm ndaj këtij fenomeni, ndërsa më parë nuk i kushtonin rëndësi. Dhe në fakt, sipas sizmiologut, njerëzit nuk duhet të kenë probleme për tërmete me magnitudë 4.6 apo 5.0 ballë.
“Tërmeti i shtatorit të shkuar ishte në një zonë tjetër. Kurse këto lëkundje kanë ndodhur në zonën Lushnje-Elbasan-Dibër, që është një zonë aktive sizmike. Tërmete të këtij niveli janë gjeneruar vit për vit në këtë zonë. Ky tërmet është shoqëruar nga disa pasgoditje. Është karakteristikë për këtë zonë. Në vitin 2015 aty ka rënë një tërmet me shkallë 5.0.
Njerëzit, pas goditjes së 26 nëntorit, tani janë më të ndjeshëm, por më përpara kanë ndodhur të tilla lëkundje dhe njerëzit nuk duhet të kenë probleme për tërmete 4.6 apo 5.0. Goditja kryesore ka qenë 4.6 dhe lëvizjet e tjera janë më të vogla dhe po vijnë duke u shuar,” tha Ormeni.
