Këngëtarja skoceze, Emily Sande, ishte “dhurata” e këtij viti të Natës së Bardhë, që mblodhi në shesh mijëra qytetarë.
30-vjeçarja, emri i vërtetë i së cilës është Adele Emily Sande, pushtoi skenën dhe Sheshin Skënderbej në orën 21:00, për 1 orë e gjysmë.
Shiu nuk u bë pengesë për fansat e këngëtares, që ndezi atmosferën në mënyrë më fantastike.
Nëse nuk ishit në shesh dhe nuk shijuat muzikën e vërtetë “live” të saj duhet të dini disa gjëra.
Veshja kuqezi
E vutë re? Kur këngëtarja me famë botërore u ngjit në skenën e realizuar në Sheshin Skënderbej, “Iconstyle.al” vuri re veshjen kuqezi të saj.
Emily Sande kishte zgjedhur të shfaqej në koncertin e saj të parë në Shqipëri me një fustan të kuq dhe një pardesy të zezë me dizajnë lulesh.
Rastësi?
Këtë herë nuk besojmë në rastësi, por në faktin se këngëtarja është njohur me ngjyrat e flamurit shqiptar përpara ardhjes së saj.
Shtuar fakti se koncerti i saj u mbajt në një ditë të rëndësishme për ne, më 29 Nëntor.
“Faleminderit!”
Jo vetëm veshja, por Emily Sande kishte mësuar edhe një fjalë shumë të rëndësishme të gjuhës shqipe: “Faleminderit!”.
Këngëtarja e famshme falënderoi të gjithë qytetarët që ndodheshin në shesh në gjuhën shqipe.
Simboli i shqiponjës me duar
Emily Sande dinte shumë mirë si t’ia fitonte zemrën shqiptarëve. Ajo ishte informuar se shenja e shqiponjës me duar simbolizon kombin tonë. “E di që ky simbol ka rëndësi për ju”, tha Sande ndërsa bëri me duar simbolin e shqiponjës bashkë me dy këngëtarët e tjerë shoqërues të saj.
Ky moment kaq kulmor ende nuk është publikuar nga fotografët të cilët mbulonin eventin.
Pak përpara performancës së saj në Sheshin Skënderbej këngëtarja, Emeli Sande u takua me kryetarin e Bashkisë së Tiranës, Erion Veliaj.
Pasi qëndroi pak kohë në zyrë, Emeli përshëndeti përmes simbolit të shqiponjës së flamurit tonë.
