Zbardhen të tjera detaje për 18-vjeçaren, që humbi jetën tragjikisht në spitalin e Elbasanit.
Vetë familjarët e adoleshentes kanë thënë se vdekja e saj është ende e paqartë dhe janë pothuajse të bindur se faji kryesor është neglizhenca e mjekëve.
Vajza, ka ndërruar jetë disa orë pas ndërhyrjes kirurgjikale në vezore, për shkak të një komplikacioni në mushkëri.
Sipas Panoramës, mjekët pohojnë se vajzës i janë kryer të gjitha ekzaminimet e duhura, por pas trompozës në mushkëri, shanset që ajo të mbijetonte ishin pothuajse zero. Edhe pse ende nuk ka dalë përfundimi i analizave mjeko-ligjore, të afërmit e Ketjonës bëjnë fajtor mjekët, që sipas tyre janë treguar indiferentë.
“Ketjona kishte dhimbje të forta në pjesën e barkut si dhe të vjella. Mjekët e Gramshit na dërguan drejt Elbasanit për një mjekim më të specializuar. Fillimisht shkuam në urgjencën e spitalit dhe më pas në kirurgji. Pas shumë sorollatjesh, më në fund vajza u operua. Pas 10 orësh vdiq. Kjo është arsyeja pse ne kemi ngritur padi ndaj mjekëve, pasi dyshojmë se vdekja e saj është shkaktuar si pasojë e indiferencës së tyre”, tregon kunati i 18-vjeçares.
Ndërkohë grupi hetimor po kryen veprime të mëtejshme në bashkëpunim me ekspertët mjeko-ligjorë për përcaktimin e shkakut të vdekjes.
