Covid-19 ka pushtuar thuajse çdo institucion në vend. Më problematike mbeten ato arsimore, të cilat po vuajnë pasojat e një viti të pazakontë për shkak të pandemisë. Vazhdimisht janë raportuar raste të infektuarish në shkolla, edhe pse Ministria e Arsimit deri më tani nuk patur asnjë reagim mbi këtë çështje. Mësuesja e Letërsisë në gjimnazin e “Ismail Qemali”, Irma Marku, denoncon në “Iconstyle.al”, për raste infektimesh në këtë shkollë. E shqetësuar, ajo shprehet se po vihet në rrezik jeta e fëmijëve dhe mësueseve. Më tej shton se edhe pse Ministria e Arsimit dhe ajo e Shëndetësisë janë në dijeni dhe deri më tani nuk kanë marrë asnjë masë. Marku, thotë se teksa ishin të gjithë të angazhuar për të zbatuar protokollet anti-Covid në nisje të vitit shkollor, brenda ekipit të tyre kishte persona të prekur. “Ky fakt u mësua me vonesë, pasi drejtuesit përgjegjës bënë përpjekjet e tyre, ta mbanin të fshehur. Kjo fshehtësi ka zgjatur disa ditë. Kohë gjatë së cilës kolegë, por edhe nxënës kanë qenë kontakte të personave të prekur”– deklaron ajo.
Irma Marku, mësuese
Rastet e prekura me Covid në shkollë
E pyetur se kush deri më tani rezulton i prekur me Covid-19, mësuesja thotë se e konfirmuar është vetëm zëvendësdrejtoresha e shkollës. “Pavarësisht shenjave dhe komplikacioneve, njëra prej mësueseve e ka marrë përgjigjen e tamponit pasi e ka ndjekur si paciente tek mjeku i familjes dhe ka rezultuar negative. Gjithsesi nga përgjigja e analizave të bëra, mjekja i ka referuar mësueses se vlerat e shtuara të disa elementeve ishin tregues parësore të infektimit me Covid-19. Ndërkohë që nuk kemi një pasqyrim konkret të mësuesve që kanë bërë tampon ditën e enjte në shkollë dhe rezultatet e tyre”- nënvizon mësuesja.
Mësuesve nuk u bëhet tamponi
Edhe pse këta mësues janë të karantinuar, shqetësuese mbetet fakti që pjesës tjetër nuk i është bërë tamponi, pasi kanë qenë rast kontakti me të infektuarit. “Autoritet përkatëse si arsimore dhe shëndetësore, ndonëse kanë dijeni për atë që ka ndodhur në shkollën tonë, nuk kanë ndërmarrë masa konkrete të bërjes së tamponit, analizave sierologjike, së paku të trupës arsimore e cila është në kontakt të vazhdueshëm me nxënësit, duke i ekspozuar dhe ata ndaj riskut”– denoncon më tej. Për mësuesen e gjithë kjo situatë është kriminale. “Nga e mërkura pasdite që është marrë rezultati deri ditën e sotme (dje), duhet të ishin testuar të gjithë mësuesit. Kontaktet më të afërta të cilat janë testuar janë bërë brenda ambienteve e institucionit arsimor, në katin e parë ndërkohë që mësimi vazhdonte normalisht”.
Gjimnazin “Ismail Qemali”
Mësuesit të mobilizuar për të ndryshuar situatën
Sipas mësueseve kjo situatë nuk mund të vazhdojë gjatë dhe për këtë arsye duhet të reagojnë të gjithë nën një zë. “Është gjendur në një terren të tillë, është i pashmangshëm edhe reagimi kolektiv. Lodhja, presioni dhe nëpërkëmbja do të çojnë në një qëndrim të përbashkët. Mësuesit janë të revoltuar, sepse janë njëherësh edhe prindër. Reagimi duhet të jetë gjithëpërfshirës dhe të mendojmë që viti shkollor t’u shërbejë nxënësve për të marrë maksimumin e dijes. Të gjenden mekanizma të harmonizuar mes infrastrukturës dhe burimeve njerëzore, që të kemi porritet të padiskutueshëm cilësinë e mësimmarrjes. Drejtues dhe përfaqësues të SPASH, si Nevruz Kaptelli, Isa Halili, Arian Peraj ekspertët e njohur si Ndriçim Mehmeti, Fatmir Vejsiu, mësues Ardi Stefa, Brunilda Çerraga janë ndër emrat e paktë që kanë reaguar periodikisht dhe intensivisht rreth shqetësimeve serioze që ka sjellë Pandemia në procesin mësimor.”– deklaron ajo.
Reagimi i Ministrisë së Arsimit
E kontaktuar nga “Iconstyle.al”, Ministria e Arsimit në lidhje me çështjen në fjalë ka deklaruar se të gjitha rastet e konfirmuara janë izoluar. “Ekspertët e Task-Forcës janë ata që marrim vendime për çdo rast”- tha Ministria. Më tej shtoi se situata në vija të përgjithshme po ecën mirë. “Sigurisht që ka infektime (që kanë qenë para fillimit të shkollës), por rëndësi ka që zëvendësimet janë bërë në kohë reale dhe po tregohet kujdes maksimal. Çdo shkollë ka përfaqësues nga shëndetësia (personi që merr formularët dhe i deklaron në ISHP). Pra, reagimi ndodh në kohë reale”– deklaroi MASR për “Iconstyle.al”.
MASR
