Dy të mbijetuarat e aksidentit të tmerrshëm që ndodhi në dalje të tunelit të Elbasanit, Denisa Dibra dhe Nervida Garunja, tashmë e kanë kaluar rrezikun për jetën.
Dy shoqet ndodhen në gjendje të stabilizuar shëndetësore, pavarësisht dëmtimeve në kokë të cilat sipas mjekëve nuk përbëjnë rrezik për jetën.
Por dy vajzat nuk mbajnë mend asgjë nga aksidenti tragjik i asaj nate dhe ngjarja tragjike e 13 shtatorit ku humbën jetën Lusinda Garunja dhe Xheneta Qallia nuk ju kujtohet.
Burime për ABC News bëjnë me dije se nuk janë në dijeni se motra e njërës prej tyre Lusinda dhe shoqja e tyre Xheneta Qallia kanë ndërruar jetë.
Babai i të mbijetuarës nga aksidenti i tmerrshëm i Elbasanit, Edmond Dibra tregoi dy ditë më parë se Denisa nuk kujton shumë gjëra nga aksidenti dhe kur është përmendur ka kërkuar shoqet e saj.
Mjekët kanë rekomanduar që të pritet deri në stabilizimin e plotë të gjendjes së tyre, dhe më pas t’u komunikohet lajmi i hidhur me praninë e një psikologu.
Katër vajzat po shkonin të festonin ditëlindjen e 19-të të Lusinda Garunjës e cila fatkeqësisht ndërroi jetë në aksident. Ato u përplasën nga pas nga një makinë tip “Benz” që drejtohej nga Behar Pema.
Shtetasi i cili kishte bërë manovra të rrezikshme para se të aksidentohej, rezultoi i dehur në testin e alkoolit dhe u arrestua nga uniformat blu.
/Iconstyle.al
