Dasmat janë pezullluar për momentin në Shqipëri, duke qenë se janë një shkelje e rregullave të distancimit në kohë pandemie. Por vera po afron dhe datat sigurisht janë ndarë me kohë, madje çiftet mund të kenë prenotuar edhe fustanin, kostumin apo lokalin.
Po atëherë si do të ndodhin ato? Armand Peza nga Geraldina ka dhënë një skenar me disa rregulla që mund të ndiqen në një dasmë në lokal.
I ftuar mbrëmë në studion e emisionit “Opinion”, Peza tha se kjo gjë nuk mund të kalohet thjeshtë pasi vetëm për dasma gjatë një viti në Shqipëri konsumohen 165 milionë euro minimumi.
“Eventet të kryhen vetëm në ambiente të hapura. Në tavolina që zënë 12 persona, të lihet një karrige bosh pas çdo të ftuari. Kështu i ftuari ka largësi 3 metra nga personi tjetër. Për tavolinat më të mëdha, ku mund të ulen 24 persona, të lihen 2 karrige bosh pas çdo të ftuari, pra të ulen 8 persona. Tavolinat të kenë distancë nga njëra-tjetra 4 metra. Në çdo tavolinë të ketë 1 ose 2 dezinfektues dhe dorashka në dispozicion. Pas çdo pjate kamerierët do ndryshojnë dorashkat. Ata që do të kërcejnë do të mbajnë dorashka. Për çdo event le të ketë 2 mbikëqyrës, një nga Ministria e Shëndetësisë dhe një nga Ministria e Rendit. Që kur ka diçka që nuk shkon të pezullohet eventi”, tha Peza në emisionin “Opinion”.
