Familja e Blendi Fevziut u bekua pak kohë më parë me ardhjen në jetë të vajzës së dytë të gazetarit, Alis dhe tani familja e tij mbizotërohet nga femrat. I ftuar në “Pushime on Top”, Blendi tregoi se i dedikon shumë kohë të voglës Alis krahasuar me vajzën e madhe Mishel dhe vrapon me shpejtësi në shtëpi, për të qenë pranë së voglës.
Blendi u kthye pas në kohë dhe kujtoi historinë e tij të parë të dashurisë dhe nëse mendoni se është Inesi, bashkëshortja, gaboheni rëndë.
“Jo, nuk ka qenë Inesi. Unë jam dashuruar për herë të parë në vitin e dytë të gjimnazit. Isha i dashuruar me shoqen e klasës, që tani më duket qesharake. Ishte nga ato dashuritë që gëzoje kur pas gjashtë muajsh i prekje dorën dhe emocionoheshe pafund” – tregoi Blendi Fevziu për “Pushime on Top”.
