Billy Joel ka hapur zemrën për një nga periudhat më të errëta të jetës së tij, në dokumentarin e ri Billy Joel: And So It Goes, që u shfaq premierë këtë javë në Tribeca Festival, New York.
Në pjesën e parë të dokumentarit, këngëtari 76-vjeçar zbulon se ka tentuar dy herë të vetëvritet dhe ka rënë në koma, pas një lidhjeje dashurie me gruan e ish-shokut të tij të ngushtë dhe anëtar të bandës, Jon Small.
Në fillim të viteve ’70, Joel ishte pjesë e grupit “Attila”, së bashku me Small. Ata jetonin në një shtëpi me Elizabeth Weber, gruaja e Jon në atë kohë dhe djalin e tyre. Elizabeth e përshkruan lidhjen me Joel si një “afrim të ngadaltë”, derisa gjithçka doli në dritë.
“Jam i dashuruar me gruan tënde,” i kishte thënë Joel mikut të tij.
“U ndjeva shumë fajtor… Ata kishin një fëmijë. U ndjeva si shkatërrues familjesh,” rrëfen autori i “Piano Man”. “Jon më goditi me grusht, dhe e meritoja.”
Pas kësaj, grupi u shpërbë, miqësia mori fund, ndërsa Elizabeth u largua. Joel ra në një spirale depresioni dhe vetmie.
“Nuk kisha ku të flija. Flija në lavanderi, isha i dëshpëruar në atë pikë sa mendoj se isha në prag të çmendurisë,” tha ai.
“Thjesht ndihesha në shumë dhimbje… e mendoja: ‘Pse të vazhdoj? E nesërmja do jetë po njësoj si sot dhe sot është e tmerrshme.’”
Vite më vonë, Billy dhe Elizabeth u martuan dhe qëndruan bashkë nga viti 1973 deri në 1982.
