Danjela Toçi është kuksiania e vogël që i befasoi të gjithë me zërin e saj në “The Voice Kids”. Ajo jeton me gjyshen e sëmurë, motrat dhe vëllain e saj në një shtëpi modeste ku shumë prej orendive që ne jemi mësuar ti shikojmë në shtëpitë tona mungojnë. Prindërit e saj jetojnë në fshat duke bërë punë të rënda në mënyrë që t’i sigurojnë jetesën fëmijëve të tyre.
Dje, Danjela në një rrëfim ekskluziv për “Top Show Magazine” rrëfeu dëshirën më të madhe të jetës së saj. Dëshirat e saj nuk janë si të çdo fëmije të moshës së saj. Nuk dëshiron as lodra, as Ipad e telefona, por kërkon që vëllai i saj i sëmurë të përmirësohet sa më shumë. Vuajtjet e jetës e kanë rritur para kohe Danjelën duke na befasuar të gjithëve me përgjigjet e saja, që nuk janë si të një 13-vjeçareje.
“Dëshira më madhe që kam është që vëllai im me ‘aftësi speciale’, të përmirësohej më shumë, që edhe ai të shkojë në shkollë si të tjerët. Falënderoj Zotin që e kanë pranuar tek kopshti i fëmijëve”, tha Danjela me lot në sy.
Pavarësisht se jeta e ka sprovuar në moshë shumë të vogël, Danjela ka një shpirt shumë pozitiv dhe është optimiste për jetën.
“Më pëlqen muzika, por dëshiroj të bëhem veterinere, që të shëroj kafshët. Më pëlqen të jetoj në fshat, më pëlqen jeta origjinale”, tha ndër të tjera Danjela.
