Vetëm pak ditë më parë u bë publik lajmi i arrestimi të 2 pedagogëve, 4 sekserëve dhe dekanit të Universitetit “Aleksandër Xhuvani” në Elbasan, të cilët akuzohen se merrnin para për provimet.
Të akuzuarit kanë dalë ditën e sotme para gjykatës së Elbasanit nën akuzën e korrupsionit pasiv në institucionet publike, përkatësisht në Universitetin e Elbasanit.
Gjyqtare për shqyrtimin e këtij rasti është emëruar Enkeleda Kapedani, ndërsa Prokuror i çështjes është Ridvan Sutkja.
7 personat e arrestuar dyshohet se në periudha kohe të ndryshme kanë bashkëpunuar me njëri-tjetrin duke shfrytëzuar postin publik për marrjen e parave për dhënien e notave kaluese për studentët gjatë sezonit të provimeve.
Sipas “FaxWeb” mësohet se shefja e departamenti të gazetarisë, Elvira Lumi, pas arrestimit ka pësuar gjendje shoku, e lidhur kjo dhe më sëmundjen më të hershme për të cilën ajo po merrte mjekim.
Seanca gjyqësore do të zhvillohet me dyer të mbyllura dhe aksioni në fjalë është bërë për t’i paraprirë sezonit të provimeve.
Ndërkohë organi i akuzës po vazhdon hetimet për evidentimin veprimtarisë kriminale edhe ndaj personave të tjerë.
Burimi: Faxweb
