Shpesh pas një debati të fortë arrijmë në ekstreme për të shfryrë nervat, por askush deri më sot nuk ka bërë diçka të tillë si ky 48-vjeçar nga Italia.
Pas një sherri me gruan e tij, 48-vjeçari në fjalë u largua nga shtëpia dhe bëri plot 450 kilometra rrugë në këmbë për t’u qetësuar. Mediat italiane raportojnë se shëtitja e tij nisi në Como dhe përfundoi në Fano.
Burri u gjet në 2 të mëngjesit nga një patrullë policie që kryente kontrolle për t’u siguruar për respektimin e masave anti-Covid. 48-vjeçari u dërgua menjëherë në stacionin më të afërt të policisë dhe u zbulua se kishte humbur kontaktin me familjarët prej 1 jave. Pavarësisht shqetësimit të tij, burri u gjobit nga polica për thyerjen e rregullave anti-Covid.
Kur policët e ndaluan në Fano, 48-vjeçari, banues në provincën e Comos, ishte i kthjellët dhe i mirë-orientuar, por i lodhur dhe i ftohtë.
“Eca në këmbë deri këtu. Nuk përdora asnjë automjet. Këto ditë hëngra dhe piva sepse njerëzit që takova gjatë rrugës më ofruan ujë dhe ushqim. Jam mirë, pak i lodhur”, ka deklaruar 48-vjeçari para policisë.
Ndërsa burri ishte duke udhëtuar në këmbë, gruaja e tij e kishte raportuar në polici si të zhdukur. Pasi u lajmërua nga policia, gruaja shkoi në Fano për të marrë burrin e saj.
