Cristiano Ronaldo ka shkruar një tjetër faqe në historinë e futbollit, këtë herë jashtë fushës së lojës. Sipas Bloomberg, një nga agjencitë më prestigjioze të lajmeve financiare në botë, ylli portugez është bërë futbollisti i parë miliarder në histori.
Pasuria neto e 39-vjeçarit vlerësohet në rreth 1.2 miliardë euro, duke e pozicionuar atë në majat e sportistëve më të pasur në botë. Bloomberg thekson se ky sukses financiar nuk ka ardhur vetëm nga paga e tij si futbollist, por nga një kombinim i zgjuar mes sportit, biznesit dhe marketingut personal.
Pjesë e rëndësishme e kësaj pasurie janë marrëveshjet e sponsorizimit shumë fitimprurëse që Ronaldo ka pasur ndër vite me marka gjigante si Nike, Armani, Clear, dhe linjat e tij personale të produkteve si CR7 Underwear dhe CR7 Fragrances.
Megjithatë, një rol kyç në arritjen e këtij statusi miliarder ka pasur kontrata e tij me klubin saudit Al-Nassr, e cila u nënshkrua në qershor 2023. Sipas Bloomberg, kjo marrëveshje i ka sjellë Ronaldos mbi 400 milionë dollarë, duke e bërë atë një nga sportistët më të paguar ndonjëherë.
Cristiano Ronaldo, i cili ka luajtur për klubet më të mëdha në botë si Manchester United, Real Madrid dhe Juventus, vazhdon të thyejë rekorde, tani jo vetëm në futboll, por edhe në botën e financave.
