Kufijtë e jashtëm të Bashkimit Europian mund të mos hapen më 1 korrik për qytetarët e rajonit të Ballkanit Perëndimor.
Komisioni Europian para dy javësh sugjeroi që kufijtë e brendshëm të BE-së të hapen jo më vonë se 15 qershori, ndërsa ata të jashtëm gradualisht prej 1 korrikut.
KE kishte konstatuar se situata në rajonin, ku bën pjesë edhe Shqipëria, është “e ngjashme apo edhe më e mirë sesa në vendet e BE-së” dhe kishte vendosur që të hapte kufijtë më 1 korrik.
Mirëpo, ajo që ndodhi është se situata në rajon është përkeqësuar në të gjitha shtetet përbërëse, ku janë vënë re shifra rekord të të prekurve.
Kjo ka bërë që disa shtete të BE-së të marrin masa dhe të vihet në pikëpyetje heqja e kufizimeve për hyrjen në BE të shtetasve të vendeve të Ballkanit Perëndimor, raporton “Radio Europa e Lirë”.
Zëdhënësi për çështje të migrimit në Komisionin Evropian, Adalbert Jahns, ka thënë se u takon vendeve anëtare të vendosin për heqjen apo jo të kufizimeve për qytetarët e Ballkanit Perëndimor.
“Rekomandimi nuk ishte vetëm për shkak të situatës epidemiologjike por edhe për shkak të raporteve të BE-së me atë rajon. Sa i përket situatës, ne jemi duke e ndjekur me shumë kujdes. Diskutimet në KE janë në vazhdim e sipër dhe në ato diskutime merret parasysh edhe situata aktuale epidemiologjike”.
Edhe pse Komisioni Europian mund të paraqesë rekomandime, vendimi për të hapur apo jo kufijtë u takon vendeve anëtare.
Disa vende anëtare të BE-së tashmë janë duke i rritur masat për kufizimin e hyrjes së shtetasve nga vendet e Ballkanit Perëndimor, siç bëri Sllovenia, ndërsa Kroacia kërkon që personat që hyjnë në territorin e saj, e rrjedhimisht edhe në atë të BE-së, të dëshmojnë arsyen domosdoshme për një udhëtim të tillë.
