Mbi 2,000 njerëz, përfshirë civilë dhe personel ushtarak, janë vrarë si pasojë e luftës në Iran, sipas vlerësimeve të CNN, ndërsa konflikti po hyn në ditën e 14-të.
Në Iran, më shumë se 1,300 njerëz janë vrarë në Iran që nga fillimi i konfliktit, tha të mërkurën ambasadori i Iranit në Kombet e Bashkuara. Kohët e fundit, shifrat nga Agjencia e Lajmeve të Aktivistëve të të Drejtave të Njeriut (HRANA) me seli në SHBA e kanë vënë këtë shifër shumë më të lartë. Sipas vlerësimeve të tyre të premten, ka pasur të paktën 1,858 vdekje, përfshirë viktima civile dhe ushtarake. Autoritetet iraniane nuk e kanë përditësuar numrin zyrtar për më shumë se një javë.
Ndërkohë të paktën 15 izraelitë janë vrarë. Këtu përfshihen nëntë të vrarë në një goditje të drejtpërdrejtë me raketë në një ndërtesë banimi në qytetin Beit Shemesh dhe dy ushtarë izraelitë që u vranë në Libanin jugor të dielën në mëngjes.
Nga pala amerikane, gjithsej 13 anëtarë të shërbimit amerikan janë vrarë që nga fillimi i konfliktit, përfshirë gjashtë që humbën jetën kur avioni i tyre i furnizimit me karburant u rrëzua në Irak të enjten. Gjashtë anëtarë të tjerë të shërbimit amerikan u vranë në një sulm iranian që goditi një qendër operacionesh të improvizuara në Kuvajt të dielën.
Në Irak kanë humbur jetën 32 persona, shumica e tyre ushtarë nga Forca Popullore e Mobilizimit (PMF). PMF tha në një deklaratë se të paktën 27 anëtarë të saj ishin vrarë deri të enjten. Një ushtar francez u vra gjithashtu në një sulm ndaj një baze ushtarake në Kurdistanin irakian të enjten.
Sakaq CNN raporton se 6 kuvajtianë kanë humbur jetën. Këtu përfshihet një vajzë 11-vjeçare që vdiq nga plagët e marra kur ranë pjesë raketash në një zonë banimi më 4 mars.
Ministria e mbrojtjes e Emirateve të Bashkuara Arabe tha të martën se gjithsej gjashtë persona me kombësi emiratiane, pakistaneze, nepaleze dhe bangladeshiane janë vrarë si pasojë e “sulmeve”.
Një person u vra në Bahrein pasi mbeturinat nga një raketë e shkatërruar shkaktuan zjarr në një “anije të huaj” në Qytetin Industrial Salman të Bahreinit, thanë mediat shtetërore javën e kaluar. Ndërkohë, një grua 29-vjeçare vdiq pas një sulmi iranian në kryeqytetin Manama, sipas Ministrisë së Brendshme të Bahreinit.
Në Oman 3 persona janë vrarë, përfshirë një shtetas indian i cili vdiq pasi një dron sulmoi cisternën e naftës në të cilën po punonte 52 milje detare larg bregdetit të Omanit, raportoi Agjencia e Lajmeve të Omanit. Përveç kësaj, dy shtetas të huaj u vranë në një “përplasje” droni në distriktin Sohar, tha të premten ministria e mbrojtjes e vendit.
Në Arabinë Saudite 2 persona u vranë pasi një predhë ushtarake goditi një ndërtesë banimi në qytetin Al-Kharj më 8 mars, tha Mbrojtja Civile Saudite./tch
