Duke qenë një popull tejet krenar, tipar me të cilin jemi identifikuar shekuj më parë, ne shqiptarët kemi një dobësi për vendet e para. Por ndonëse në listat e rritjes ekonomike renditemi ndër vendet e fundit, në një listë specifike shkëlqejmë e madje jemi gjithnjë e më afër majës: atë të çmimit të naftës. Sipas një studimi të Global Petroleum Prices, në qershor të këtij viti Shqipëria renditej e 13-a në botë për çmimin më të lartë të naftës dhe duket se jemi gati të përparojmë edhe më shumë në këtë aspekt.
Në një artikull të botuar së fundmi nga “monitor.al”, bëhet e ditur se Ministria e Financës dhe Ekonomisë ka hapur garën për një koncension me afat 20-vjeçar për kontrollin e matësve të karburantit dhe të gazit në të gjithë vendin, gjë që ka shqetësuar drejtuesit e kompanive të karburanteve në Shqipëri, për shkak se sipas tyre, kjo procedurë bie në kundërshtim me ligjin.
Në një deklaratë për “monitor.al” ata shprehen se në ligjin nr. 9875 datë 14.02.1008, neni 40, pika 2, shpjegohet qartësisht se kontrolli dhe kolaudimi i matësve kryhet nga Drejtoria e Përgjithshme e Metrologjisë dhe në rastet kur ky institucion e ka të pamundur diçka të tillë, mund të autorizojë një person juridik për kryerjen e kësaj veprimtarie.
“Deri më tani kjo Drejtori nuk është se nuk ka pasur mundësi të kontrollojë tregun plus që tek ky institucion janë investuar pafund në trajnime dhe laboratore modern që tani nuk dihet për çfarë do i shërbejnë.”-shprehen ata, duke shtuar se shteti po kalon një shërbim monopol tek një kompani private, duke mos dhënë madje as argumenta se çfarë interesi ka konsumatori nga ky koncension.
Sipas drejtuesëve të kompanive të karburanteve në vend, në sistemin e pikëzimit që do të përdoret për vlerësimin e kompanive në garë, mungon kostoja me të cilën do të ofrohet ky shërbim, çka sigurisht krijon hapsira për abuzim, gjë që sipas tyre do të përkthehet në një çmim më të lartë për konsumatorët. “Fakti që në pikëzim nuk është përfshirë kostoja me të cilën do të ofrohet shërbimi nga privati është një problem shumë i madh. Koncesionari mund ta vendosë tarifën 2000 lekë për shërbimin por mund ta vendosë edhe 50 mijë lekë tek e fundit ai nuk kufizohet në garë nga kjo pjesë. Sot ky shërbim ofrohet për 7200 lekë dhe çmimi duhet të ishte pjesë e vlerësimit.”-deklarojnë ata për “monitor.al”. Për artikullin origjinal klikoni këtu.
