Sokol Cikalleshi nuk luan sot kundër Galasaray sepse drejtuesit e Konyaspor vendosën ta lënë jashtë listës. Bashkë me sulmuesin e Kombëtares është lënë jashtë dhe portieri i parë Paul Bernardoni.
Ky vendim erdhi pasi dy lojtarët kërkuan të shlyheshin pagat e prapambetura. Kështu raporton “Webaslan” nga Turqia. Veprim i çuditshëm ky nga klubi që militon në Superligën turke. Cikalleshi është golashënuesi i sezonit për ta, ndërsa Berndardoni ka luajtur çdo ndeshje si titullar duke mbrojtur portën.
Mediet turke bëjnë me dije se portieri francez ka shkuar më tej, duke angazhuar avokatët pasi ka “disa kohë” i papaguar. Tre muaj pagë nuk ka marrë as Cikalleshi, që ka shënuar tetë gola këtë edicion në elitën e Turqisë.
Tanimë pritet të shihet sesi palët do veprojnë, me lojtarët që kanë të drejtë të ankohen në FIFA dhe me gjasë do fitonin çështjen, duke bllokuar merkaton dhe asetet e Konyaspor. Kujtojmë se kavajasi Cikalleshi luajti i huazuar në Arabinë Saudite sezonin e shkuar dhe ka kontratë edhe për gjashtë muaj me Konyaspor.
